Մի լուսանկարի հետքերով

ՀՀ մշակույթի նախարար Արմեն Ամիրյանն իր ֆեյսբուքյան էջում հրապարակել է մի լուսանկար, այն մակագրելով այսպես. «24, հունվար, 2017թ., հենց նոր. «Համահայկական նվագախումբն այլևս իրողություն է-2», Էդուարդ Թոփչյան, Սերգեյ Սմբատյան, Աննա Տեր-Հովակիմյան, Ռուզան Սիրունյան և Արմեն Ամիրյան»

Արդյո՞ք Մշակույթի նախարարի այս գրառումն ու հրապարակած լուսանկարն ավետում են, որ Հայաստանի ազգային ֆիլհարմոնիկ նվագախմբի ղեկավար Էդուարդ Թոփչյանի և Հայաստանի երիտասարդական նվագախմբի գլխավոր դիրիժոր Սերգեյ Սմբատյանի միջև տարաձայնությունները հարթվել են, թե՞ սա, պարզապես, պաշտոնական հրապարակում է և խնդիրները շարունակում են խորքում թաքնված մնալ, փորձեցինք պարզել: ԼՈւՐԵՐ.com-ը փորձեց կապ հաստատել Էդուարդ Թոփչյանի հետ, ինչը մեզ չհաջողվեց, փոխարենը՝ խոսեցինք Հայաստանի պետական ֆիլհարմոնիկ նվագախմբի փոխտնօրեն Դավիթ Թերզյանի հետ: Մեր հարցին՝ Համահայկական նվագախմբում երկու գլխավոր դիրիժորների համատեղ աշխատանքը փաստո՞ւմ է արդյոք, որ Էդուարդ Թոփչյանի և Սերգեյ Սմբատյանի միջև լարվածությունը թուլացել է, վերջինս պատասխանեց. «Համահայկական նվագախմբում բոլորս միասին պետք է լինենք, և այստեղ որևէ այլ ամբիցիա չի կարող լինել, դա ընդհանուր գործ է, որը պետք է կազմակերպել բարձր մակարդակով»,-նշեց Դավիթ Թերզյանը՝ հավելելով. «Ես երջանիկ կլինեմ, որ այդ տարաձայնությունները հարթված լինեն, և հավատում եմ, որ այդպես էլ կլինի»:

Արդյո՞ք երկու գլխավոր դիրիժորներին հաշտեցնելու հարցում իր ներդրումն է ունեցել Մշակույթի նախարար Արմեն Ամիրյանը, մեր զրուցակիցը պատասխանեց. «Իհա՛րկե, ունեցել է, և շատ մեծ»: 

Թեմայի հետ կապված՝ փորձեցինք պարզաբանում ստանալ նաև Սերգեյ Սմբատյանից: Վերջինս մեզ հետ կապ չհաստատեց՝  Հայաստանի երիտասարդական նվագախմբի մամլո խոսնակի միջոցով փոխանցելով, որ սա իր համար փակված թեմա է: 

Հիշեցնենք, որ մամուլում Էդուարդ Թոփչյանի և Սերգեյ Սմբատյանի միջև խնդիրների մասին լուրերը կրկին ակտիվացան ՀՀ Մշակույթի նախարարին հասցեագրված մի նամակից հետո, որի մասին ԼՈւՐԵՐ.com-ն արդեն գրել է: 

Աղավնի Սուքիասյան