«Սահմանին շատ լարված է. մամային, պապային չասես»

Ռադիոլրագրող, հրապարակախոս Գոհար Մարտիկյանի «Ապրելու բանաձև» պատմավավերագրական մատենաշարի 10-րդ հատորը նվիրված է 2016թ. Ապրիլյան պատերազմում զոհված 73 հերոսի, իսկ գրքում ներկայացված է նրանց կենսագրությունն ու սխրանքի պատմությունը:

ԼՈւՐԵՐ.com-ի թղթակցի հետ զրույցում անմահ հերոս Արամայիս Սահակյանի մայրը`Լիլիթ Ավագյանն ասաց, որ որդին ծառայել է Ջաբրայիլում, հայտնի է եղել որպես քանդակագործ: Մայրը որդուն բնութագրեց այսպես` «ձեռքից շնորհքով, արվեստի մարդ, բանիմաց ու խելացի»:

Լիլիթ Ավագյանը պատմեց` Արամայիսը թաքցրել է, որ դիրքերում է եղել: Միայն փոքր եղբոր հետ է կիսվել ու ներկայացրել, թե ինչ լարվածություն է տիրում սահմանին: Եղբորը խնդրել էր՝ «մամային, պապային չասես»:

«Փոքր տղայիս հանձնարարել է՝ «ավարտին կհասցնես իմ կիսատ թողած բոլոր գործերը, մամային ու պապային էլ լավ կնայես»:

Տիկին Լիլիթն ապրում է որդու մշտարթուն հիշողություններով: Միայն թե կարոտն ու սպասումն են խեղդում: 2017 թվականի հունվար ամիսը սպասված էր նրանց համար. որդին պետք է զորացրվեր հունվարի 17-ին:

«Ապրելու բանաձև» պատմավավերագրական մատենաշարի 10-րդ հատորում հեղինակն, անդրադառնալով Արամայիսին՝ ներկայացնում է նրան որպես քանդակագործ:

«Սովորում էր իրավագիտական բաժնում: Պատմություն շատ էր սիրում ու լավ գիտեր: Երևի պատմությունն իր էության մեջ էր ու ինքն էլ դարձավ պատմական հերոս», - ասաց հերոսի մայրը:

Սոնա Հարությունյան

Նարեկ Ավանեսյան