Պետերբուրգյան ընդդիմությունը փոխել է «Ժողովրդական զբոսանքներ»-ի անցկացման վայրը

ՌԴ Պետերբուրգ քաղաքում ռուսական ընդդիմության կազմակերպած անժամկետ «ժողովրդական զբոսանքներ» ակցիայի մասնակիցներն այսօր՝ ցերեկը, իրավապահ մարմինների խնդրանքով, հեռացել են Ալեքսանդրովյան այգուց։ Ներկայումս ընդդիմադիրները տեղափոխվել են Արվեստների հրապարակում գտնվող Պուշկինի հուշարձանի մոտ։ Այս մասին РИА Новости-ին է հայտնել պետերբուրգյան ընդդիմության առաջնորդներից Օլգա Կուռնոսովան։

Արդեն երկու շաբաթ է՝ Պետերբուրգում անց են կացվում այսպես կոչված «ժողովրդական զբոսանքները», որոնք հիմնականում կազմակերպվում էին Իսաակովյան հրապարակում։ Երկուշաբթի օրը Իսաակովյան հրապարակում սկսված վերանորոգման աշխատանքների պատճառով ակցիայի մասնակիցները երեքշաբթի օրը տեղափոխվեցին Ալեքսանդրովյան այգի։ Իսկ այսօր իրավապահ մարմինների աշխատակիցները խնդրել են ակցիայի մասնակիցներին հեռանալ Ալեքսանդրովյան այգուց։ «Այս պահին մենք գտնվում ենք Արվեստների հրապարակում և դեռ որոշ ժամանակ էլ այստեղ կմնանք»,- ասել է Կուռնոսովան։