Ֆլինը պատմել է ՌԴ-ի դեսպանի հետ կայացած բանակցությունների մասին. Daily Caller

Ռուսաստան 15 Փետրվար, 2017 10:45

ԱՄՆ-ի նախագահի ազգային անվտանգության հարցերով նախկին օգնական Մայքլ Ֆլինը հայտարարել է, որ «սահմանները չի անցել» ՌԴ-ի դեսպան Սերգեյ Կիսլյակի հետ կայացած բանակցությունների ընթացքում՝ պարզաբանելով, որ իրականում խնդրո առարկա են եղել ոչ թե պատժամիջոցները, այլ ԱՄՆ-ից 35 ռուսաստանցի դիվանագետների վտարման փաստը: Այս խոստովանությունը նա արել է պաշտոնաթողությունից առաջ տված իր վերջին հարցազրույցում, որը փետրվարի 14-ին հրապարակվել է Daily Caller ցանցային հրատարակությունում:

«Խնդրո առարկան եղել են ոչ թե պատժամիջոցները, այլ այն 35 հոգին, որոնց վտարել են (երկրից)»,- ասել է Ֆլինը: «Իրականում սա է եղել խոսակցությունը. «Այո, ես գիտեմ, թե ինչ է տեղի ունեցել, մենք ամեն ինչ կուսումնասիրենք»: Բայց ես երբեք չեմ ասել, թե «մենք պլանավորում ենք վերանայել պատժամիջոցները» կամ էլ այդ ոգով մի այլ բան»,- հավելել է նա: Դրա հետ մեկտեղ Ֆլինը հայտարարել է, որ իրեն շատ ավելի անհանգստացնում է գաղտնի տեղեկատվության, մասնավորապես, քաղաքական գործիչների զրույցների մասին տեղեկատվության մամուլ արտահոսելու հետ կապված իրադրությունը:

Փետրվարի 13-ին ԱՄՆ-ի նախագահ Դոնալդ Թրամփն ընդունել է ազգային անվտանգության խորհրդականի դիմումը պաշտոնից հրաժարական տալու մասին: Փաստաթղթում նա նշել է, որ փոխնախագահ Մայք Փենսին եւ Սպիտակ տան մյուս ներկայացուցիչներին լիովին չի իրազեկել Ռուսաստանի դեսպանի հետ իր զրույցների մասին:

Փետրվարի 14-ին Սպիտակ տան ներկայացուցիչ Շոն Սփայսերը ճեպազրույցի ժամանակ պարզաբանել է, որ ԱՄՆ-ի նախագահ Դոնալդ Թրամփը Ֆլինին խնդրել է պաշտոնաթող լինել, քանի որ նրա նկատմամբ կորցել է վստահությունը, հաղորդել է ՏԱՍՍ-ը: