«Օհանյան-Րաֆֆի-Օսկանյան» դաշինքի նախընտրական շտաբը ղեկավարելու է Արմեն Մարտիրոսյանը

«Օհանյան-Րաֆֆի-Օսկանյան» դաշինքի նախընտրական շտաբը ղեկավարելու է «Ժառանգություն» կուսակցության փոխնախագահ Արմեն Մարտիրոսյանը: Փետրվարի 17-ին լրագրողների հետ հանդիպմանն այս մասին հայտնեց դաշինքի համամասնական ցուցակի առաջին համար, ՀՀ պաշտպանության նախկին նախարար Սեյրան Օհանյանը: «Շուտով պատրաստ կլինի նաև մեր նախընտրական ծրագիրը, որը կներկայացնենք հանրությանը: Քարոզարշավի ընթացքում ես ամենից շատ կարևորելու եմ Հայաստանի և Արցախի անվտանգության խնդիրները»,- հաղորդմամբ' ասաց Օհանյանը:

Սեյրան Օհանյանը նշեց, որ դաշինքի ցուցակում ընդգրկված են մարդկային բարձր որակներով, կրթվածության բարձր մակարդակով աչքի ընկնող անձինք:

Օհանյանը գովասանքի խոսքեր հնչեցրեց դաշինքի կազմում ընդգրկված կուսակցությունների ղեկավարների հասցեին:

Խոսելով «Համախմբում» կուսակցության առաջնորդ Վարդան Օսկանյանի մասին' նա նշեց, որ հրաժարվելով ԱՄՆ քաղաքացիությունից, բարեկեցիկ կյանքից, Օսկանյանը եկել էր Հայաստան, տասը տարի եղել արտաքին գործերի նախարար, բարձր մասնագիտական, մարդկային որակներով ողջ գործունեությունը նվիրել Հայաստանին:

Նրա գնահատմամբ' «Ժառանգություն» կուսակցության առաջնորդ Րաֆֆի Հովհաննիսյանը իր ազնվությամբ, հայրենասիրությամբ վաստակել է ժողովրդի անվերապահ սերն ու հարգանքը:

Ազգային ժողովի առաջիկա ընտրություններին մասնակցելու հայտ են ներկայացրել 5 կուսակցություն և կուսակցությունների 4 դաշինք: Ապրիլի 2-ին նախատեսված ընտրություններին մասնակցելու համար ԿԸՀ առաջադրման փաստաթղթեր են ներկայացրել ՀՀԿ-ն, ՀՎԿ-ն, «Ազատ դեմոկրատներ»-ը, Հայաստանի կոմունիստական կուսակցությունը, ՀՅԴ-ն, ինչպես նաև «Ելք», «Օհանյան-Րաֆֆի-Օսկանյան», «Ծառուկյան» և Կոնգրես-ՀԺԿ դաշինքները՝ ընդհանուր 1539 թեկնածուով: