Հայաստանին դուր չի գալիս, որ Ադրբեջանը զենք է գնում Ռուսաստանից. Նալբանդյան

Հայաստանին, իհարկե, դուր չի գալիս, որ Ադրբեջանը սպառազինություն է գնում Ռուսաստանից։ Այս մասին Ռիա Նովոստիին հայտարարել է ՀՀ ԱԳ նախարար Էդվարդ Նալբանդյանը։

«Իհարկե, մեզ չի կարող դուր գալ, որ Ադրբեջանը զենք է գնում մեր դաշնակցից, որը որպես Մինսկի խմբի համանախագահ, շատ ջանքեր է գործադրում, նաև Հայաստանի հետ փոխհամագործակցությամբ, մեր տարածաշրջանում խաղաղության ու կայունության պահպանման համար»,-ասել է նախարարը։

Էդվարդ Նալբանդյանը նաև նշել է, որ Հայաստանը ստիպված է ջանքեր գործադրել՝ ուժերի հավասարակշռությունը պահպանելու համար։

«Ինչ վերաբերում է «սպառազինությունների մրցարշավին». Հայաստանը չէ, որ սպառնում է պատերազմ սկսել, Հայաստանը չէ, որ պարծենում է իր ռազմական բյուջեի թվերով և գնած զենքի քանակով, Հայաստանը չէ, որ խախտում է Եվրոպայում սովորական սպառազինությունների մասին պայմանգրի նորմերը։ Թե ինչի է դա հանգեցնում, մենք տեսանք այս տարվա ապրիլին։ Բնականաբար, այդ պայմաններում մենք ստիպված ենք ջանքեր գործադրել տարածաշրջանում ուժերի հավասարակշռությունը պահպանելու և նոր սրացումներ, նոր պատերազմ թույլ չտալու համար», - հավելել է Նալբանդյանը։