«Փաստ». Վահրամ Բաղդասարյանը նորմալ է համարում աղմկոտ խոսակցությունների թիրախում հայտնվելու փաստը

«Փաստ» օրաթերթը գրում է.

«Պարզվում է ԿԸՀ ներկայացված ՀՀԿ ցուցակը կազմված է այն տրամաբանությամբ, որ մինչև 64–րդ համարը ներկայացված են այն թեկնածուները, որոնք միայն համամասնական ցուցակով են մասնակցելու ընտրություններին: 65 համարից սկսած, ըստ ընտրատարածքների հերթականության և այբբենական կարգի, ներկայացված են կուսակցության ռեյտինգային թեկնածուների անունները: Ուստի այդ է պատճառը, որ օրինակ՝ ԱԺ ՀՀԿ խմբակցության ղեկավար Վահրամ Բաղդասարյանը ցանկում 152–րդ համարն է զբաղեցրել:
«Նպատակահարմարությունից ելնելով որոշում ենք կայացրել մարզերում նույնպես հնարավորինս քաղաքական դեմքերով ներկայացված լինենք: Մենք ենք որոշել, թե ովքեր են ռեյտինգային կարգով մասնակցելու ընտրություններին: Սկզբում այն մասնակիցներն են, ովքեր ռեյտինգայինով ներկայացված չեն լինելու, ապա ռեյտինգային թեկնածուներն են ներկայացված»,– «Փաստին» ասաց Վահրամ Բաղդասարյանը:
Նա համաձայն չէ, որ ՀՀԿ–ի ցուցակում այս անգամ նույնպես հին դեմքերի պակաս չկա: Ընտրացուցակը քննադատողներն, ըստ նրա, այն ժամանակ են ուրախանում, երբ ՀՀԿ–ի ցուցակում խոցելի անուններ են գտնում: Սակայն պատգամավորի կարծիքով այն բավականին թարմացված է, իսկ ընտրողներին ամենևին էլ պետք չէ դատարկ խոսքերով համոզել: Փոխարենը՝ ՀՀԿ–ն էլ, օգտագործելով իր բոլոր ուժերը, պետք է ամեն ինչ անի, որպեսզի շահի ընտրողների վստահությունը:
«Մեր ցուցակը բավականին տրամաբանական և հնարավորինս քաղաքականացված է: Ինչ վերաբերում է ցուցակի տխուր լինելուն, եթե արդեն իսկ կան կարծիքներ, որ ՀՀԿ–ին կհաջողվի մեծամասնություն կազմել, ապա դա նշանակում է, որ մեր ցուցակը բավականին ուրախ է: Երկրորդ՝ մենք բոլոր քաղաքական ուժերին շատ լուրջ ենք վերաբերում, որևէ մեկի ուժերը չենք թերագնահատում և բոլորին համարում ենք մրցակիցներ: Մնացած հարցերի պատասխանը կտա հանրությունը»,– ասաց Վ. Բաղդասարյանը:
Խոսելով ընտրություններին Հայաստանի կոմունիստական կուսակցության մասնակցության մասին, նա նշեց, որ կուսակցությունն իր բացասական ու դրական կողմերով անցած 70 տարիների ընթացքում բավականին մեծ դերակատարում է ունեցել և քաղաքական պրոցեսներից երբևէ հետ չեն մնացել, իսկ վերջին տարիներին պարզապես բավականին պասիվ են եղել:
«Նրանք նույնպես բավականին երիտասարդացրել են իրենց ցանկերը և այնտեղ ներառել են քաղաքական դաշտում հայտնի մարդկանց, ինչը ողջունելի է: Եվ եթե նայեք, ԱՊՀ շատ երկրներում շատ տեղերում նրանք բավականին ակտիվ են, իսկ Ռուսաստանում մինչ օրս որևէ անգամ չի եղել, որ Կոմունիստական կուսակցությունն ինչ–որ ձևով ներկայացված չլինի քաղաքական դաշտում»,– ասաց Վ. Բաղդասարյանը:
Հայոց խորհրդարանի շուրջ ձևավորված ցածր վարկանիշ ունենալու մասին տեսակետը փոխելու համար Վ. Բաղդասարյանը ընտրողներին կոչ արեց ավելի զգոն լինել և ձայնը տալ այնպիսի քաղաքական ուժերի, որ հետագայում նման քննադատության առիթ չլինի: Բացի այդ, իշխող քաղաքական ուժի համար կարևոր է, որ ընտրություններն անխոցելի և ընկալելի լինեն ոչ միայն տեղական, այլև՝ միջազգային հանրության համար:
Հարցին, թե արդյո՞ք ՀՀԿ–ի վարկանիշի վրա չի ազդում հասարակության շրջանում տարածված ընտրակաշառք բաժանելու մասին խոսակցությունները, որոնք արդեն իսկ թերահավատության և անվստահության մթնոլորտ են ձևավորել, ԱԺ ՀՀԿ խմբակցության ղեկավարն ասաց:
«Բնականաբար մեր ընդդիմադիրները պետք է նման հարցեր շահարկեն: Բոլորն են գիտակցում, որ չկա մի քաղաքական ուժ, որը ապագա խորհրդարանում մեծամասնություն կազմելու հավակնություն ունենա և նման աղմկոտ խոսակցությունների թիրախում չհայտնվի: Ես կոչ եմ անում և խնդրում եմ, որ եթե կան փաստեր, ապա բարձրաձայնվեն դրանք և մենք միանգամից կկանխարգելենք: Արդեն մամուլում որոշ անուններ հրապարակվել են, մենք դրանց հետքերով գնացել ենք և պարզել, որ պարզապես ստահոդ տեղեկություններ են: Երբ կլինեն փաստեր, մենք դրանց կանդրադառնանք»,– ասաց Վ. Բաղդասարյանը»:

Շարունակությունը' «Փաստ» օրաթերթի այսօրվա համարում: