Մոսկվայում բանկ գրաված Արամ Պետրոսյանի ձերբակալությունը երկարացվել է

Մոսկվայի Պրեսնյայի դատարանը երկու ամսով երկարացրել է գործարար Արամ Պետրոսյանի ձերբակալությունը, որն անցյալ տարվա ամռանը բանկ էր գրավել ՌԴ մայրաքաղաքի կենտրոնում: Այդ մասին հայտնել է «Ինտերֆաքս»-ի թղթակիցը:

«Դատարանը որոշեց բավարարել մեղադրյալ Պետրոսյանի նկատմամբ խափանման միջոցը կալանքի տեսքով մինչեւ ապրիլի 24-ը երկարացնելու քննիչի միջնորդությունը»,- փետրվարի 21-ին որոշումը հրապարակել է դատավոր Մարիա Կուդրյաշովան:
Պետրոսյանին մեղադրանք է ներկայացվել պատանդառության եւ ահաբեկչության գործով:

2016 թվականի օգոստոսի 24-ի երեկոյան «Սիթիբանկի»՝ Մոսկվայի կենտրոնում գտնվող մասնաճյուղ, որտեղ գտնվում էր չորս մարդ, տղամարդ է մտել, որի պարանոցին տուփ էր ամրացված լարերով, եւ սկսել է սպառնալ, որ կպայթեցնի իրեն: Չնայած սպառնալիքներին, երեկոյի ընթացքում տղամարդը ազատ է արձակել պատանդներին եւ հանձնվել:

Պարզվել է, որ պատանդառուն 55-ամյա սնանկացած ձեռնարկատեր Պետրոսյանն է: Իր մեղքը նա ընդունել է մասնակիորեն:
Օգոստոսի 26-ին Մոսկվայի Պրեսնյայի դատարանը հետաքննության միջնորդությամբ արտոնել է նրա ձերբակալումը:

Գործարարը պնդում է, որ չէր պատրաստվում վնաս պատճառել պատանդներին, այլ միայն ցանկանում էր ուշադրություն հրավիրել իր խնդրի վրա: Բանկի վրա հարձակվելուց առաջ նա YouTube-ում զետեղել է տեսահոլովակ, որում նախազգուշացրել է, թե «կդիմի ՌԴ Քրեական օրենսգրքի կտրուկ խախտման» եւ առաջադրել է պահանջներ՝ «պետական մակարդակով ֆիզիկական եւ իրավաբանական անձանց սնանկացումը ճանաչել հիվանդություն», ինչպես նաեւ ստեղծել նոր ինստիտուտ, որը կզբաղվի սնանկացման խնդրով:
Քննիչները որպես հանցագործության կատարման առաջնային դրդապատճառ են դիտարկում մեղադրյալի ծանր ֆինանսական դրությունը եւ տարբեր բանկերի վարկերի դիմաց վճարելու հնարավորության բացակայությունը: