Բողոքի ակցիա կառավարության շենքի դիմաց. նախկին օդաչուները պատրաստվում են դիմել Եվրոպական դատարան

Հաշմանդամության ունեցող նախկին օդաչուներն այսօր՝ փետրվարի 23-ին, հաշվի չառնելով եղանակային անբարենպաստ պայմանները՝ ձյունն ու բուքը, կրկին հավաքվել էին կառավարության շենքի դիմաց և պահանջում էին մասնագիտական գործունեության ընթացքում առողջությանը հասցված վնասի փոխհատուցում։

ԼՈւՐԵՐ.com-ի թղթակցի հետ զրույցում նախկին օդաչու, հրամանատար Սարգսյանն ասաց, որ պահանջում են՝ հաշմանդամ օդաչուների և զոհված օդաչուների հարազատները փոխհատուցում ստանան. «2006թ. հետո մինչև հիմա չեն ստանում փոխհատուցում: Հին կառավարությանն ինչքան դիմել ենք, թե օրենքներ են խախտում՝ ապարդյուն: Կոնվենցիա են ստորագրել 2005թ. հաշմանդամների մասին, բայց հին կառավարությունը՝ Դավիթ Հարությունյանի հետ միասին, խաբում են մեզ: Դիմեցինք ՄԻՊ-ին, Արդարադատության նախարարություն և Բաղրամյան 26, հիմա զբաղվում են,- ասաց նա՝ ավելացնելով, որ եկել է մի կառավարություն, որը, հույս ունեն՝ կլուծի խնդիրը:

Նախկին օդաչուի խոսքով՝ պայքարը չեն դադարեցնելու ու դիմելու են Եվրոպական դատարան՝ իրենց հարցը լուծելու համար:

Ավիատեխնիկ Վանիկ Մայիլյանը նշեց, որ պետությունը պարտավոր է տեր կանգնել իրենց և փոխհատուցում վճարել, քանի որ իրենք պետական առաջադրանք կատարելու ընթացքում են դարձել հաշմանդամ. «Ես ավիատեխնիկ-բրիգադիր եմ աշխատել: Ինքնաթիռի վրա աշխատանք կատարելու ժամանակ ընկել եմ ցած, վիրահատվել եմ, 10 տարի բուժվել Մոսկվայում, կորցրել եմ հիշողությունս, ձեռք եմ բերել էպիլեպսիա»,- ասաց Վանիկ Մայիլյանը, հավելելով՝ 2006 թվականի սեպտեմբերի 1-ից արգելել են փոխհատուցման վճարումը, իսկ այժմ իրենք պահանջում են վերականգնել փոխհատուցման վճարումը:

Սոնա Հարությունյան