Հայաստանի բասկետբոլի Մ18 հավաքականը նոր գլխավոր մարզիչ ունի

Հայաստանի տղամարդկանց մինչև 18 տարեկանների հավաքականի գլխավոր մարզիչ է նշանակվել փորձառու մասնագետ Եղիշ Դավթյանը: Այս մասին տեղեկացնում է Հայաստանի բասկետբոլի ֆեդերացիայի մամուլի ծառայությունը:

Եղիշ Դավթյանը ծնվել է 1950 թվականին: Ավարտել է ֆիզիկական կուլտուրայի հայկական պետական ինստիտուտը և Սանկտ Պետերբուրգի Լեսգաֆտի անվան ֆիզկուլտուրայի ինստիտուտի ասպիրանտուրան, մանկավարժական գիտությունների թեկնածու է, դոցենտ:

1990-1993 թթ. աշխատել է Ֆիզկուլտուրայի ինստիտուտում, որպես մարզախաղերի ամբիոնի վարիչ, հեղինակ է հիսունից ավելի տպագրված աշխատանքների:

ԽՍՀՄ սպորտի վարպետ է, մասնակցել է ԽՍՀՄ ժողովուրդների չորս սպարտակիադաների:

2002 թ. շնորհվել է ֆիզիկական կուլտուրայի և սպորտի վաստակավոր աշխատողի կոչում:

2004 թ. շնորհվել է Հայաստանի վաստակավոր մարզչի կոչում:

1985-1989 թթ. մարզել է Ալժիրի ժողովրդական հանրապետության բասկետբոլի հավաքական թիմը և բարձրագույն խմբի մի շարք ակումբներ, մասնակցել է Աֆրիկայի և Արաբական երկրների առաջնություններին:

1990-1993 թթ.մարզել է «Ուրարտու» մարզական ակումբի բասկետբոլի թիմը:

1993-2000 թթ. մարզել է Լիբանանի ազգային հավաքականը և բարձրագույն խմբի մի քանի թիմեր, դարձել է երկրի գավաթակիր, երկրի պատանիների չեմպիոն , Արաբական երկրների բրոնզե մեդալակիր:

2001-2002 թթ. Սիրիայի Հալեպ քաղաքում մարզել է «Ալ-Ջալահ» ակումբի տղաների և աղջիկների բարձրագույն խմբերի թիմերը:
Հիշեցնենք , որ Հայաստանի բասկետբոլի մինչև 18 տարեկանների հավաքականը ելույթ կունենա Եվրոպայի առաջնության C դիվիզիոնում: Ա ենթախմբում Հայաստանի մրցակիցներն են՝ Կոսովոյի, Նորվեգիայի և Կիպրոսի հավաքականները: