ՀՀ պետական բյուջեից Շիրակի մարզին գումար է տրամադրվել հրատապ խնդիրների լուծման համար

ՀՀ պետական բյուջեից Շիրակի մարզին գումար է տրամադրվել հրատապ խդիրների լուծման համար: Այս ծրագրով մարզին նախատեսվել է ընդհանուր առմամբ 550 մլն դրամ, սակայն առաջին փուլով հատկացվել է 250 մլն դրամ գումար:

Այս մասին լրագրողներին փետրվարի 23-ին տեղեկացրեց Շիրակի մարզպետ Հովսեփ Սինոնյանը: «Ծրագրերի կապիտալ ծախսերը ֆինանսավորովում են, եթե կան նախագծա-նախահաշվային փաթեթներ: Մեր կողմից ներկայացված որոշ ծրագրեր չունեին այդ փաթեթները, այդ իսկ պատճառով պայմանավորվածություն ձեռք բերվեց, որ տրամադրվի 250 մլն դրամ, որից շուրջ 10 մլն 500 հազար դրամն ուղղորդվելու է նախագծա-հետազոտային փաստաթղթերի ստեղծմանը՝ այն ծրագրերի, որոնցում դրանք բացակայում են»,- նշեց Հովսեփ Սիմոնյանը՝ փաստելով, որ առաջին փուլում ընդգրկվել են այն ծրագրերը, որոնք ավելի անհրաժեշտ են, օրինակ, Արթիկում և Մարալիկում ձյան շերտի պատճառով փլուզված տանիքների վերականգնումը: «Այս փուլում ընդգրկված են նաև այն ծրագրերը, որոնք մեկնարկել էին, բայց ֆինանսների բացակայության պատճառով դադարեցվել էին: Այս ծրագրի շրջանակում փողոցների հիմնանորոգման աշխատանք կտարվի Արթիկում, Ազատանում՝ բուժամբուլատորիայի շենքի վերանորոգում, Գյումրիում ևս կան փողոցաշինական և դպրոցաշինական ծրագրեր, կվերականգնվի նաև Հառիճ-Նահապետավան ճանապարհը»,- նշեց Շիրակի մարզպետը՝ հավելելով, որ մարզում կան ծրագրում ընդգրկված այլ համայնքներ ևս: Որոշակի սուբվենցիա հատկացվել է նաև այն ծրագրերի համար, որոնք իրականցվելու են Գյուղական համայնքների տնտեսական զարգացման իրականացման գրասենյակի՝ 22 մլն դրամ համաֆինանսավորմամբ:

«Անշուշտ, իրականում շատ դժվար է եղել առանձնացնել այս կամ այն ծրագիրը, քանի որ շատ չլուծված խնդիրեն կան, որոնց համար գումարներ են անհրաժեշտ: Կա ՀՀ վարչապետի խիստ հանձնարարականը՝ միջոցների արդյունավետ ու նպատակային օգտագործման վերաբերյալ: Հուսանք, որ աշխատանքները նորմալ ու որակով կիրականացվեն: Իսկ հայտարարված մրցույթների արդյունքում կկարողանանք տնտեսել գումար, որն էլ հնարավորություն կտա այլ ծրագրեր իրականացնել»,-նշեց Հովսեփ Սիմոնյանը:
Հրատապ խնդիրների լուծման աջաջին փուլը սկսվելու է առաջին եռամսյակում: Աշխատանքներն իրականացնող կազմակերպությունների մրցույթները կհայտարարվեն առաջիկայում: Իսկ մյուս փոլով նախատեսված գումարը կհատկացվի մյուս ծրագրերի նախագծանախահաշվային փաթեթեները ներկայացնելուց հետո:
Արմենուհի Մխոյան