«Էխո Մոսկվի»–ի հայ լրագրող Սերգեյ Ասլանյանը դանակի 20 հարված է ստացել

Մոսկվայում հարձակման է ենթարկվել «Էխո Մոսկվի» ռադիոկայանի հաղորդավար և «Մայակ» ռադիոկայանի աշխատակից Սերգեյ Ասլանյանը։ Լրագրողը ստացել է դանակի ավելի քան 20 հարված և ուղեղի ցնցում, հաղորդում է Lifenews.ru։

Դեպքը տեղի է ունեցել լրագրողի բնակարանի մոտ։ Անհայտ անձինք, նախօրոք պատրաստված, սպասել են Ասլանյանին։

Նրան անգիտակից վիճակում տեղափոխել են հիվանդանոց։ Վիրահատությունից հետո լրագրողը տեղափոխվել է վերակենդանացման բաժանմունք և մինչ այժմ գիտակցության չի եկել։

Ինչպես նշում է Lifenews.ru–ն, մայիսի 14-ին լրագրողը եթերում անհարգալից է արտահայտվել Մուհամեդ մարգարեի հասցեին՝ մասնավորապես նրա մասին հնչեցնելով «ցեխից իշխան դարձավ» արտահայտությունը։ Դա հարուցել է մուսուլմանական հասարակության խիստ բացասական վերաբերմունքը։

Զակաբանի մզկիթի իմամն ու հավատացյալները, և Թաթարստանի հասարակության ներկայացուցիչները դիմել են Ռուսաստանի Գլխավոր դատախազություն՝ հայտարարելով, որ վիրավորված են Ասլանյանի խոսքերից։

Ներկայումս լրագրողի հիվանդասենյակում հերթապահում են ոստիկանները։ Այնտեղ են գտնվում նաև քննիչներ դեպքի պատճառները պարզելու համար։