3 մլն ռուբլի՝ Քսենիա Սոբչակի հետ պարելու դիմաց

Հեռուստահաղորդավարուհի Քսենիա Սոբչակը կարծես թե հասցնում է մասնակցել և՛ ընդդիմության ցույցերի, և՛ բարեգործական ակցիաների, և՛ շոու–բիզնեսի աստղերի մասնակցությամբ միջոցառումների։ Վերջերս Սոբչակը վարել է Չուլպան Խամատովայի հիմնադրամի համար կազմակերպված դրամահավաքի միջոցառումը։

Օրեր առաջ «Կյանք նվիրիր» բարեգործական հիմնադրամի կազմակերպիչները թենիսի մրցաշար են անցկացրել, որին մասնակցել են ոչ թե պրոֆեսիոնալ մարզիկներ, այլ մարդիկ, որոնք ցանկացել են օգնել հիվանդ երեխաների։ Մրցաշարին մասնակցելու համար նրանք գումար են վճարել, որը հանձնվել է Դինա Կորզունի և Չուլպան Խամատովայի հիմադրամին։ Ի դեպ, մրցաշարի հաղթողներ են ճանաչվել մոսկովյան գործարարներ Եվգենի Տռայչունը և Սերգեյ Պոպովը։

Մրցաշարի ավարտից հետո մասնակիցներն ու հյուրերը մասնակցել են բարեգործական աճուրդի։ Ի թիվս շատ հայտնի մարդկանց իրերի վաճառքի՝ հետաքրքիր առաջարկով է հանդես եկել Սոբչակը։ Նա աճուրդի է հանել... իր հետ պարելը։

Նշենք, որ այս առաջարկը միանգամից արձագանք գտավ լսարանի կողմից։ Գործարար Միխայիլ Աբրամովն առանց վարանելու նման «հաճույքի» դիմաց վճարեց 3 մլն ռուբլի։