Ինչպես Հրաչյա Հարությունյանին տեղափոխել Հայաստան

«Հայ վարորդ Հրաչյա Հարությունյանին Հայաստան տեղափոխելը իրավական կարգավորման ենթակա հարց է: Ընդամենը պետք է հարցին իրավական լուծում տալ և ոչ թե ընկնել ինչ-ինչ քաղաքական դիվիդենտներ շահելու հետևից»,-այս մասին ԼՈւՐԵՐ.com-ի հետ զրույցում ասաց փաստաբան Նիկոլայ Բաղդասարյանը:

Ըստ մեր զրուցակցի՝ Հրաչյա Հարությունյանի գործում պետք  չէ խառնել քաղաքականությունը, քանի որ հայ վարորդին Հայաստան տեղափոխելն ամբողջությամբ տեղավորվում է իրավական գործընթացների տիրությում. «Որպեսզի նրան տեղափոխեն Հայաստան, առաջին հերթին անհրաժեշտ է դիմում ներկայացնել ՌԴ դատախազությանը: Սա առաջին քայլն է, որից և պետք է սկսել»:

Նիկոլայ Բաղդասարյանն անընդունելի է համարում Հրաչյա Հարությունյանի անվան տակ որոշակի քաղաքական պրոցեսների շահարկումը: Ըստ մեր զրուցակցի՝ այս հարցն անգամ չեն կարող կարգավորվել ՀՀ և ՌԴ ՄԻՊ-երը: «ՀՀ ՄԻՊ-ը բացարձակապես որևէ դերակատարում  չունի այս գործում: Նույնը կասեմ նաև ՌԴ ՄԻՊ-ի համար»:

Նիկոլայ Բաղդասարյանը պատրաստ է աջակցել հայ վարորդին Հայաստան տեղափոխելու գործընթացին, սակայն կան հարցեր, որոնք պետք է կարգավորեն հենց Հարությունյանի փաստաբանները.  «Ես պատրաստ եմ իմ աջակցությունը ցուցաբերել, բայց նախքան դա՝ Հրաչյա Հարությունյանի փաստաբանները պետք է ՌԴ դատախազությանը ներկայացնեն Հարությունյանի դիմումը: Հնարավոր է դիմել և այդ ընթացակարգը անցնել: Ես հետևում եմ գործին. չկա որևէ գրավոր հիմնավորում, որ փաստաբանը դիմել է ՌԴ դատախազությանը՝ հայ վարորդի պատժի կրումը Հայաստանում շարունակելու խնդրանքով և  նրան  մերժել են: Մինչդեռ գործը պետք է սկսել հենց այդ քայլից»:

Հիշեցնենք, որ ՌԴ քրեադատավարության օրենսգրքով՝ Հրաչյա  Հարությունյանը դատապարտվել է 6 տարի 9 ամիս ազատազրկման: Հրաչյան մեղավոր էր ճանաչվել երկու հոդվածներով՝ ՌԴ քրեական օրենսգրքի 264-րդ (ճանապարհային երթեւեկության եւ տրանսպորտային միջոցների շահագործման կանոնների խախտում) եւ 327-րդ (կեղծ փաստաթղթերի օգտագործում): Հարությունյանն անազատության մեջ է արդեն երկու տարի:

Աղավնի Սուքիասյան