«Փաստ». Ջավախահայության խնդիրները Հայաստանի և Վրաստանի վարչապետների քննարկումների օրակարգում

«Փաստ» օրաթերթը գրում է.

«Վարչապետ Կարեն Կարապետյանի' Վրաստան կատարած այցից հետո բոլոր փորձագետները համարյա ընդգծված ձևով արձագանքեցին, որ ջերմացում է տեղի ունեցել հայ–վրացական հարաբերությունների մեջ: Անշուշտ այստեղ դեր է խաղում ոչ միայն երկու երկրների վարչապետների անձնական հարաբերությունները: Մասնագետները արձանագրում են, որ վրացական կողմի մոտ տեղի է ունեցել նաև քաղաքական հարաբերությունների վերանայում: Ավելի կառուցողական են տրամադրված հայ–վրացական խնդիրները օրակարգ բերելու և դրանց լուծում տալու հարցում:
Շիրակ Թորոսյանի խոսքն է' «Ես կարծում եմ, որ քաղաքական հարաբերությունների մեջ որոշակի վերանայումներ են եղել: Եվ այդ վերանայումների արդյունքում դիտվում է հարաբերությունների ջերմացում: Մեր վարչապետի պրագմատիկ գործելաոճը ևս վստահություն է ներշնչում: Դա ևս կարող է նպաստել երկու երկրների հարաբերությունների բարելավմանը: Բայց ընդհանուր առմամբ, իմ կարծիքով, քաղաքականության փոփոխություն է տեղի ունեցել վրացական կողմի մոտ»:
Անշուշտ, այս այցն ընդգծվեց մի կարևոր առանձնահատկությամբ: Պետական կարևորագույն հարցերի կողքին, ինչպիսին արտաքին հաղորդակցության ուղիների որոնումն էր, որի շուրջ ծավալվեցին երկու երկրների վարչապետների հիմնական քննարկումները, Կարեն Կարապետյանը բարձրացրեց նաև ջավախահայության հիմնախնդիրները և վրաց իր գործընկերոջ հետ խոսեց դրանց լուծման ուղիների մասին:
Սա նորություն է վերջին տարիների համար: Քանզի բավականին երկար ժամանակ է, ինչ նման բարձր մակարդակով չեն քննարկվել հայության այս հատվածի համար կենսական կարևորություն ունեցող հարցերը, չեն կատարվել հարցադրումներ:
Իսկ որո՞նք են այսօր ջավախահայության առջև ծառացած բազմաթիվ հիմնախնդիրներից կարևորագույնները, որ միջամտության ու լուծման կարիք ունեն: Բանն այն է, որ թուրք–ադրբեջանական տանդեմը ողջ Վրաստանի տարածքում կատարում է տնտեսական ակտիվ էքսպանսիա: Օրեցօր ավելանում է այս երկրների ազդեցությունը Վրաստանի տնտեսական, հետևաբար նաև' քաղաքական կյանքի վրա: Վրացիներն արդեն իսկ զգում են, որ հատվում է վտանգավորության գիծը:
Թուրք–ադրբեջանական այդ ազդեցությունն արդեն փորձում է տարածվել Ջավախքում: Տարածաշրջանին սպառնում է նաև թուրքացման վտանգը: Ահա այս հարցերի օրակարգ բարձրացնելու փաստը «Ջավախք» հայրենակցական միության նախագահ, պատգամավոր Շիրակ Թորոսյանի կարծիքով, առավել քան կարևոր էին:
Ըստ պատգամավորի՝ բավականին առարկայական և հասցեական բնույթ կրեցին վարչապետի հարցադրումները: Շեշտադրում կատարվեց նաև կրթության ոլորտում կուտակված խնդիրներին: եվ այդ հարցերին լուծումներ տալու համար առաջիկայում տեղի կունենա մեր կրթության և գիտության նախարարի այցը Վրաստան:
Իսկ Վրաստանի հարցերով փորձագետ Ալիկ Էրոյանցի կարծիքով, շատ կարևոր էր վրաց գործարարներին հայկական բիզնես միջավայր հրավիրելու մեր վարչապետի առաջարկը: Եվ այն դրականորեն ընդունվեց վրացիների կողմից:
Ոչ պակաս կարևոր հանգամանք պետք է դիտել նաև այն, որ երկու երկրների վարչապետները անկեղծորեն խոստովանեցին, որ միմյանցից սովորելու բան ունեն երկուստեք. մենք' վրացիներից, վրացիները' մեզնից: Հայերս կարող ենք ուսումնասիրել վրացիների փորձը զբոսաշրջության ոլորտում, իսկ վրացիներն էլ կարող են ուսումնասիրել տեղեկատվական տեխնոլոգիաների ոլորտում մեր երկրի գրանցած հաջողությունները:
Իսկ երբ երկկողմ հարաբերություններում առաջանում է անկեղծություն, այդ հարաբերությունները ձեռք են բերում այդպիսի բովանդակություն, որ ըստ փորձագետի, դրանք անպայման ունենում են շարունակականություն:
Եվ եթե կարողանանք պահել շփումների ակտիվությունը, ապա դա միանշանակ կնպաստի նաև հետագայում առաջացող խնդիրների լուծմանը, իսկ վերջնարդյունքում' սեղանին դրված փաստաթղթերի ստորագրմանը»:

Շարունակությունը' «Փաստ» օրաթերթի այսօրվա համարում: