Ծանրորդներն ավարտեցին ուսումնամարզական հավաքը Ծաղկաձորում

Ծանրորդներն ավարտեցին ուսումնամարզական հավաքը Ծաղկաձորում:

Ազգային հավաքականի գլխավոր մարզիչ եւ ծանրամարտի ֆեդերացիայի գլխավոր քարտուղար Փաշիկ Ալավերդյանը ՀԱՕԿ լրատվականին տեղեկացրեց, որ հավաքին հրավիրված էին 10 մեծահասակներ և 11 պատանիներ:

«Մարզումներն անցկացնում էինք համատեղ: Մեծահասակները նախապատրաստվում են ապրիլի 1-9-ը Խորվաթիայի Սպլիտ քաղաքում կայանալիք Եվրոպայի առաջնությանը, պատանիները՝ նույն ժամանակահատվածում Թաիլանդում նշանակված այդ տարիքային խմբի աշխարհի առաջնությանը», - ասաց նա:

Մարզիչները ծաղկաձորյան հավաքում հիմնականում ուշադրություն են դարձրել մարզիկների տեխնիկական եւ արագաուժային որակներին: Երկու հավաքականները հաջորդ համատեղ հավաքը կշարունակեն մարտի 6-ից՝ Աբովյան քաղաքում:

Մեծահասակների հավաքականը Եվրոպայի առաջնություն մեկնելու է Փաշիկ Ալավերդյանի գլխավորությամբ, իսկ պատանիների հավաքականը՝ Էդիկ Կիզողյանի: