ԵԼՔ կա՞...

Գալիք խորհրդարանական ընտրություններին մասնակցության հայտ են ներկայացրել թվով 9 քաղաքական ուժեր, որոնց շարքում իր նախընտրական խանդավառությամբ և «նոու-հաու»-ներով աչքի է ընկնում հատկապես ԵԼՔ դաշինքը: «Լուսավոր Հայաստան», «Հանրապետություն» եւ «Քաղաքացիական պայմանագիր» կուսակցությունները, 2017 թվականի ապրիլի 2-ին կայանալիք խորհրդարանական ընտրություններին հանդես կգա «Ընտրություն, Փոփոխություն, Հաղթանակ» կարգախոսով:

Կարգախոսը դասական է՝ քաղաքական դաշտում որպես ընդդիմադիր դիրքավորված քաղաքական ուժի համար: Միայն, կարծես թե, խախտվել է գործողությունների տրամաբանական շարունակությունը՝ ընտրությանը պետք է հաջորդի հաղթանակը, որպեսզի լինեն փոփոխություններ, բայց ինչպես ասում են՝ ԵԼՔ-ի մոտ շաբաթն ուրբաթից շուտ է եկել…

Հետաքրքրական է նաև այն փաստը, որ ԵԼՔ դաշինքը իր նախընտրական մարաթոնը սկսեց հայաշատ Լոս-Անջելոսից: Թերևս ընդգծելու համար այն փաստը, որ որոշ օբյեկտիվ և սուբյեկտիվ պատճառներով հայերի թիվն այնտեղ ավելին է, քան մեր երկրում: Սակայն ակնհայտ է՝ վերջին շրջանում համայնքը ապոլիտիկ է դարձել, քանի որ ակտիվություն չէր նկատվում անգամ ԱՄՆ նախագահական ընտրությունների ընթացքում:

ԵԼՔ-ը նորաստեղծ դաշինք է, հետևաբար այս պահին ունի քաղաքական դաշտում դիրքավորվելու, իր հարթակը գտնելու խնդիրը: Ընդդիմադիր դաշտում ռեալ ուժ դառնալու համար հարկավոր է առաջարկել նորը, և դա հատկապես վերաբերվում է ծրագրային դրույթներին: ԵԼՔ-ի ծրագիրը, որը ներկայացվեց երեկ, հիմնականում շեշտադրում է ստատուս-քվոյի փոփոխությունը, այսինքն, փոփոխությունը՝ խորքային իմաստով, հասարակական-քաղաքական գործընթացների կտրվածքով, և միայն այդպես է հնարավոր հասնել ոլորտային փոփոխությունների: Այսպիսին է ԵԼՔ-ի նախընտրական ծրագրի տրամաբանությունը:

ԵԼՔ դաշինքի անդամ կուսակցությունները չունեն քաղաքական կենսագործունեության երկար տարիների պատմություն և քաղաքական փորձառության բավականաչափ մեծ պաշար, հետևաբար այս ընտրությունները ԵԼՔ-ի մաս կազմող քաղաքական ուժերի համար նաև կարող են հանդիսանալ լուրջ ստուգատես և քաղաքական տրամպլին՝ անկախ ընտրություններում գրանցած արդյունքներից:

ԵԼՔ դաշինքի անդամ Էդմոն Մարուքյանը բազմիցս մատնանշել է ԱՄՆ-ում տեղի ունեցած խաղաղ իշխանափոխության օրինակը և հույս հայտնում, որ մեր երկրում քաղաքացիները կարոտ են նման իշխանափոխությանը: Սակայն խնդիրը միայն նրանում չէ, թե ինչպես է իրականացվելու այդ իշխանափոխությունը, կարևոր է նաև, թե՝ ում կողմից: Այսինքն, այս ընտրություններում ԵԼՔ-ը իրեն դիրքավորում է իբրև ուժ, որը դառնալու է փոփոխությունների առաջամարտիկը: Այս ամենը բարի ցանկությունների ոլորտում չէին մնա այն պարագայում, եթե ԵԼՔ-ը ռեալ հնարավորություն ունենար մեծամասնություն ստանալ նորընտիր խորհրդարանում: Սակայն հասկանալի է, որ դեպքերի նման զարգացումը քիչ իրատեսական է: 

ԵԼՔ-ի նախընտրական ծրագրի ուշագրավ կետերից մեկն է՝ հասնել բնակչության թվի կրկնակի ավելացմանը: Այս խնիդրը արծարծվել է ընտրություններին մասնակցող բոլոր ուժերի նախընտրական ծրագրերում, քանի որ ակնհայտ է՝ արտագաղթը դարձել է պատուհաս և դրան հարկավոր է դիմակայել նոր լուծումների միջոցով: ԵԼՔ-ը իր նախընտրական պլատֆորմում չի մանրամասնել այն մեխանիզմները, որոնք կարող են ի վերջո տալ այս ցավոտ լուծման բանալին: Փաստացի՝ ծրագրում ֆիքսված են հանրությանը քաջ հայտնի խնդիրները, սակայն լուծում այդպես էլ չի առաջարկվում...

Ստելլա ԽԱՉԱՏՐՅԱՆ