Ինձ գործադիրում եմ տեսնում. Տարոն Մարգարյան

Այսօր, սպարապետ Վազգեն Սարգսյանի ծննդյան օրը, Եռաբլուրում էր նաև քաղաքապետ Տարոն Մարգարյանը, ով լրագրողների այն դիտարկմանը, թե Ավան վարչական շրջանում բավականին լարված իրավիճակ է, այնտեղ պայքարը ընթանում է իր աներորդու՝ Ռոբերտ Սարգսյանի և նախկին ԴԱՀԿ պետ Միհրան Պողոսյանի միջև, ասաց. «Թե′ Միհրան Պողոսյանը, թե′ Սարգսյան Ռոբերտը, թե′ Ղուկաս Ուլիխանյանը ՀՀԿ ռեյտինգային թեկնածուներ են, իրենք միմյանց դեմ չեն մրցում»:

Դիտարկմանը, որ այս շրջանում, հատկապես տարբեր վարչական շրջանների ղեկավարներ, օգնություն են բաժանում քաղաքացիներին, դա ընտրակաշառքի մի ձև է, Մարգարյանը պատասխանեց. «ինչպես ամեն տարի, այս տարին ևս բացառություն չէ և քաղաքացիներին օգնություն է բաժանվում. ունենք հանձնաժողով, քաղաքացիները դիմում են, սոցիալապես անապահովներին միշտ էլ աջակցել ենք, այնպես չէ, որ եթե քարոզարշավ է, ուրեմն պետք է քաղաքապետարանի դռները փակվեն»:

Քաղաքապետն անդրադարձավ նաև իր հետագա անելիքներին, իսկ թե որտեղ է իրեն պատկերացնում այս ընտրություններից հետո՝ խորհրդարանո՞ւմ, թե՞ գործադիր մարմնում, միանշանակ պատասխան չտվեց. «ՀՀԿ խորհուրդը կորոշի: Կուսակցական կարգապահությունը կպահեմ, բայց ինձ տեսնում եմ գործադիրում»: