Մոսկվայում լրագրող Սերգեյ Ասլանյանի վրա հարձակման փաստով հարուցված քրեական գործը վերաորակվել է

Մոսկվայում հայազգի լրագրող Սերգեյ Ասլանյանի վրա կատարած հարձակման փաստով հարուցված քրեական գործը վերաորակվել է ոստիկանության կողմից։ Այս մասին այսօր լրագրողների հետ հանդիպմանն ասել է ՌԴ ՆԳՆՊՎ մոսկովյան ստորաբաժանման լրատվական ծառայության ներկայացուցիչը։

«Այն բանից հետո, երբ բուժհաստատությունից ստացվել են Ասլանյանի ստացած վնասվածքների բնույթը ներկայացնող փաստաթղթերը, որոշում է ընդունվել ավելի վաղ հարուցված քրեական գործը վերաորակավորել քրեական օրենսգրքի 112 հոդվածի 2-րդ մասի 5-րդ կետին համապատասխան»,- հայտնել է մոսկովյան ոստիկանության ներկայացուցիչը։ 

Այս հոդվածով նախատեսվում է առավելագույնը 5 տարվա ազատազրկում՝ ի տարբերություն նախորդի, որը նախատեսում էր առավելագույնը 2 տարվա ազատազրկում։

Հիշեցնենք, որ ինչպես ավելի վաղ հայտնել էր Լուրեր.com-ը, Մոսկվայում հարձակման էր ենթարկվել «Էխո Մոսկվի» ռադիոկայանի հաղորդավար և «Մայակ» ռադիոկայանի աշխատակից Սերգեյ Ասլանյանը։ Լրագրողը ստացել էր դանակի ավելի քան 20 հարված և ուղեղի ցնցում, հաղորդել է Lifenews.ru։ Դեպքը տեղի էր ունեցել լրագրողի բնակարանի մոտ։ Անհայտ անձինք, նախօրոք պատրաստված էին սպասել Ասլանյանին։