SSJ-100-ի պարամետրիկ արձանագրող սարքի տվյալներն ամբողջությամբ պահպանված են

Ինդոնեզիայում վթարի ենթարկված ռուսական Superjet-100 (SSJ-100) ինքնաթիռի պարամետրիկ արձանագրող սարքի տվյալները հնարավոր է եղել ամբողջությամբ պահպանել, РИА Новости-ի հետ զրույցում հայտնել է հետաքննող աշխատանքային խմբի ներկայացուցիչը։

«Հնարավոր է եղել առանց կորուստների պահպանել վթարի ենթարկված ինքնաթիռի պարամետրիկ արձանագրող սարքի ողջ ինֆորմացիան՝ այն տեղափոխելով այլ սարքի վրա։ Այժմ արձանագրված տվյալները ինդոնեզացի մասնագետների մոտ են, որոնց պատճենները մոտ ժամանակներս կտրամադրվեն ՌԴ միջպետական ավիացիոն հանձնաժողովին»,- նշել է բանախոսը։ 

Նրա խոսքերով՝ ինքնաթիռում տեղի ունեցածի պատկերը վայրկյան առ վայրկյան դեկոդավորելու գործընթացը երկար ժամանակ կտևի։

Հիշեցնենք, որ Sukhoi SuperJet-100 ռուսական ինքնաթիռն ավիավթարի էր ենթարկվել Ինդոնեզիայում՝ 2-րդ ցուցադրական թռիչքի ժամանակ։ Ինքնաթիռում եղել է 45 ուղևոր, այդ թվում՝ 8 ռուսաստանցի, որոնք բոլորն էլ զոհվել էին։