Ջավախահայերը կոչ են արել Քլինթոնին Սաակաշվիլիի առաջ բարձրացնել Վ. Չախալյանի արդարացման եւ ազատման հարցը

ԱՄՆ պետքարտուղար Հիլարի Քլինթոնի՝ հունիսի 5–ին Վրաստան կատարելիք այցի կապակցությամբ «Երկիր» միությանն է փոխանցվել Քլինթոնին հասցեագրված հանրագիր, որը միությունը փոխանցել է Երևանում ԱՄՆ դեսպանատուն:

Փաստաթղթի տակ ստորագրած ավելի քան 1650 ջավախահայեր կոչ են անում տիկին Քլինթոնին վրաց իշխանությունների առաջ բարձրացնել ջավախահայ քաղաքական գործիչ, քաղբանտարկյալ Վահագն Չախալյանի արդարացման ու ազատ արձակման հարցը։

Նամակում մասնավորապես ասված է. «Վրաստանի Հանրապետության ջավախքահայ ազգային, հասարակական–քաղաքական գործիչ Վահագն Չախալյանը իր գործունեության ընթացքում պայքարում է ոչ միայն Ջավախքի բնակչության սոցիալ–տնտեսական վիճակի բարելավման, ջավախքահայության, Վրաստանի Հանրապետության հայ բնակչության ազգային, պատմամշակութային, լեզվական, կրոնական ու կրթական արժեքների պահպանման հարցերով, այլ նաեւ Ջավախքի հայաթափման գործընթացը կասեցնելու համար։

Վերոնշյալ գործունեության ու 2006թ. հոկտեմբերին ընդդիմադիր կուսակցության կազմում նրա ղեկավարած «Միասնական Ջավախք» կազմակերպության՝ Ախալքալաքի շրջանի ՏԻՄ ընտրություններին մասնակցելու եւ իշխող կուսակցությունից 31% ձայն խլելու պատճառով, Վահագն Չախալյանը Վրաստանի իշխանություննրի կողմից ենթարկվեց քաղաքական հետապնդումների՝ փակվեցին «Ջավախք–ինֆո» գործակալությունը, «Երիտասարդական» ռադիոն, մարզամշակութային կրթական բաժինները, արգելվեց «Քաջատուն» թերթի հրատարակումը։ Վահագն Չախալյանը ապօրինի ձերբակալվեց ու շինծու մեղադրանքներով դատապարտվեց 10 տարվա ազատազրկման։ Նույն բախտին արժանացան նրա հարազատները ու կուսակիցներից շատերը։

Ուստի մենք կոչ ենք անում Ձեզ՝ Վրաստան կատարելիք այցի ընթացքում նախագահ Սաակաշվիլու առաջ բարձրացնել Վ. Չախալյանի արդարացման եւ ազատման թեման»։