Դատարանը մերժել է Ագուտինի հայցադիմումը

Ըստ ռուսական մամուլի` Մոսկվայի Սավելովսկի դատարանը մերժել է ճանաչել ՌԴ մայրաքաղաքում գտնվող, 160 քմ մակերեսով բնակարանի նկատմամբ հայտնի երգիչ Լեոնիդ Ագուտինի սեփականության իրավունքը:

Բանն այն է, որ մի քանի տարի առաջ հայտնի երաժիշտն իր ոչ պակաս հայտնի կնոջ` Անժելիկա Վառումի հետ միասին որոշել է նոր բնակարան գնել: Այդ նպատակով զույգը 20 մլն ռուբլի է ծախսել` ձեռք բերելով մոսկովյան նորակառույց շենքերից մեկում 160 քմ մակերեսով նոր բնակարան:

Սակայն, տարիներ են անցել, իսկ բնակարանը շահագործման դեռ չեն հանձնել: Աստղային զույգը զայրացած դիմել է դատարան` պահանջելով ճանաչել տվյալ բնակարանի նկատմամբ իրենց սեփականության իրավունքը և ետ վերադարձնել 60 հազար ռուբլին, որը զույգը վճարել է որպես պետական տուրք, սակայն դատարանը մերժել է հայցը:

Դատարանի աշխատակցի խոսքերով` նման դատավճռի կայացման պատճառները չեն հաղորդվում: Որոշ ԶԼՄ-ների փոխանցմամբ` աստղային զույգը` նույն նորակառույց շենքի մյուս բնակարանատերերի հետ միասին, ուղղակիորեն դարձել է իրավիճակի «գերին»: Բանն այն է, որ նորակառույցը կառուցող «Инвест-Юнион» ընկերությունը, չնայած այն հանգամանքին, որ շենքն արդեն կառուցված է, չի կարող այն հանձնել շահագործման, քանի դեռ Մոսկվայի իշխանությունները չեն վավերացրել ընկերության հետ ունեցած պայմանագրերը: