Հայկական պատվիրակությունն իր ֆունկցիան չի կատարում. հերթական խայտառակությունը Մինսկում

Այս տարվա հուլիսի 5-9-ը Բելառուսի մայրաքաղաքում տեղի է ունեցավ Եվրոպայի անվտանգության և համագործակցության կազմակերպության Խորհրդարանական  վեհաժողովը, որին մասնակցում էին 260 խորհրդարանականներ ԵԱՀԿ 55 երկրներից՝ այդ թվում և Հայաստանից:

Քվեարկությամբ ընդունվեց Մինսկի հռչակագիրը, որը ազգային կառավարություններին, խորհրդարաններին, միջազգային հանրությանն ուղղված կոչ է՝ օգնել քաղաքականություն ձևավորել քաղաքական, տնտեսական, անվտանգության, բնապահպանության և մարդու իրավունքների ոլորտներում:

ԼՈւՐԵՐ.com-ի հետ զրուցում քաղաքագետ Ռուբեն Մեհրաբյանն, անդրադառնալով Մինսկում ընդունված եզրափակիչ հռչակագրին, նշեց, որ այն հանգամանքը, որ 5 օր տևած ամենամյա նստաշրջանի ընթացքում Մինսկում գտնվող հայկակական պատվիրակությունը չի կարողացել արձանագրել Արցախի հարցում որևէ առաջընթաց, վկայում է մեր պատվիրակության, մեղմ ասած, ձախողման մասին. 

«Արևմուտքի քաղաքականությունն Արցախի հակամարտության վերաբերյալ ուրվագծված է նրանց հայտարարություններով: Այդ հայտարարությունները կայանում են նրանում, որ Վրաստանի, Ուկրաինայի և Մոլդովայի տարածքային ամբողջականությունը պետք է վերականգնվի, և այստեղ այլ կարծիք չկա, իսկ այն տարածքները, որոնք չեն վերականգնվում, համարվում են Ռուսաստանի կողմից օկուպացված տարածքներ:

Արցախի հակամարտության հարցում նույն արևմուտքը նշում է, որ կոնֆլիկտը չի կարող ունենալ ռազմական լուծում, և այս մասին նաև ԱՄՆ Պետդեպի տարբեր պաշտոնյաներն են հայտարարել տարբեր ժամանակներում: Հարցը պետք է կարգավորվի 1975 թվականի Հելսինկյան եզրափակիչ ակտի սկզբունքների համապատասխան, որով  էլ զբաղվում են ԵԱՀԿ Մինսկի խումբը և եռանախագահները, ուստի հակամարտության կողմերը սրան պետք է հետևեն: Իսկ եթե, հայկական պատվիրակությանը չի հաջողվում որևէ դրական առաջընթաց արձանագրել Արցախի հակամարտության վերաբերյալ միջազգային հանրության առաջ, վկայում է մեր պատվիրակության ձախողման մասին»:

Ըստ մեր զրուցակցի՝ հայկական պատվիակությունը մշտապես նման կարևոր հարթակներում ձախողելու է, քանի դեռ Վրաստանի, Ուկրաինայի և Մոլդովայի տարածքային ամբողջականության հարցում չի կիսում միջազգային հանրության տեսակետը. «Հայկական կողմի դիրքորոշումը Ղրիմի հարցում մեզ զրկում է առաջին հերթին բարոյական իրավունքից Արցախի հարցում միջազգային հանրությունից որևէ բան ասելու կամ պահանջելու հնարավորությունից: Սրանով  է պայմանավորված, որ հայ պատվիրակները անհաջողութուններ են ունենում»,-ասաց քաղաքագետը:

Ռուբեն Մեհրաբյանի խոսքով՝ Ադրբեջանին հակադարձելու համար որևէ բան չի անում, և քանի դեռ հետևում է Ռուսաստանի քմահաճույքներին, միջազգային հանրությունից էլ անտարբեր վերաբերմունք է ստանալու, մեզ ասում են՝ ձեր դաշնակցի օգտին քվեարկել եք, իրենից էլ պահանջեք: Ստացվում է՝ հավաքական առումով, հայկական կողմը ՀՀ-ի շահերը չի կարողանում պաշտպանել նման կարևոր միջազգային հարթակներում, հետևաբար մեր պատվիրակությունն իր ֆունկցիան չի կատարում՝ շարունակելով պաշտպանել ռուսական կողմի շահը:

Հարցին՝ ստացվում է՝ հայկական պատվիրակության անհաջողությունների պատճառը Ռուսաստանն է, իսկ ո՞ւր մնաց մեր պատվիրակների պրոֆեսիոնալիզմը, վերջինս պատասխանեց.

«Այսպես ասեմ՝ Ռուսաստանը հետխորհրդային տարածքներում հեղհեղուկ վիճակի միակ և գլխավոր ճարտարապետն է, իսկ մեր պատվիրակների պրոֆեսիոնալիզմը մենք տեսանք»:

Աղավնի Սուքիասյան