Թող Թաթոյանը գնա, 24 ժամ նստի Գևորգ Սաֆարյանի խցում. Վարդգես Գասպարի

Իրավունք 24 Հուլիս, 2017 17:47

Հայտնի «տոնածառի գործով» դատապարտված, «Ժիրայր Սեֆիլյանի ու մյուսների» գործով ամբաստանյալ Գևորգ Սաֆարյանը քրեակատարողական հիմնարկից հայտարարություն է արել պատժախցում իր պահման պայմանների մասին: Դատապարտված Սաֆարյանի փաստաբանները ևս ահազանգում են նրա կյանքին սպառնացող վտանգի մասին։ Փաստաբանների պնդմամբ, քրեակատարողական հիմնարկը Սաֆարյանին առանձնախցից ցանկանում է տեղափոխել ընդհանուր մասնաշենք, որտեղ նրան «քրեական տարրերի կողմից հաշվեհարդար» է սպասվում:

Մարդու իրավունքների պաշտպանի գրասենյակի դիմաց այսօր՝ հուլիսի 24-ին տեղի ունեցած բողոքի ակցիայի ժամանակ ակտիվիստ Վարդգես Գասպարին իր մտահոգությունը հայտնեց Գևորգ Սաֆարյանի պահման պատժախցային պայմանների վերաբերյալ, որտեղ, ըստ նրա, առկա է խոնավություն, գարշահոտություն և կոյուղու կեղտաջրերը արտահոսում են խուց. «Մարդու իրավունքների պաշտպանի ամենաարդյունավետ քայլը կլինի, որ գնա, նստի Գևորգ Սաֆարյանի խցի մոտ, դուրս չգա: Թող Թաթոյանը գնա, 24 ժամ նստի Գևորգ Սաֆարյանի խցում, հետո գա, տեսնեմ՝ ինչ կպատմի այդ խցի մասին: Ուղղակիորեն խաբեություն է, որ բուն իրականությունը չեն ներկայացնում: ՄԻՊ-ը պետական օղակներից մեկն է ու ես այստեղ եմ եկել ասելու՝ թքած ունեմ այս կեղծ բարեպաշտության վրա, որը դրսևորում է Մարդու իրավունքների պաշտպանը», - ասաց Գասպարին՝ ավելացնելով, որ ՄԻՊ-ի աշխատակիցները գնում են «Նուբարաշեն» ՔԿՀ, սակայն վերադառնալիս ներկայացնում են իրականությանը չհամապատասխանող տեղեկություններ:

Օմբուդսմանի աշխատակազմի հաղորդագրության համաձայն՝ ակտիվիստ Գևորգ Սաֆարյանին պատժախուց տեղափոխելու վերաբերյալ հրապարակումների հիման վրա Հայաստանի ՄԻՊ-ի աշխատակազմում անմիջապես սկսվել է քննարկման ընթացակարգ՝ սեփական նախաձեռնությամբ, որի մասին պատշաճ կարգով տեղեկացվել են թե՛ Սաֆարյանը, և թե՛ նրա փաստաբանը:

Քննարկում սկսելուց հետո, ինչպես նաև դրանից առաջ պարբերաբար տեղի են ունեցել չհայտարարված այցեր «Նուբարաշեն» քրեակատարողական հիմնարկ: Այցերի ընթացքում տեղի են ունեցել առանձնազրույցներ Սաֆարյանի հետ, ուսումնասիրվել են նրա վերաբերյալ փաստաթղթերը: Պաշտպանի աշխատակազմի ներկայացուցիչները «Նուբարաշեն» ՔԿՀ են այցելել նաև շաբաթ օրը՝ հուլիսի 22-ին, ինչպես նաև այսօր՝ հուլիսի 24-ին:

«Սաֆարյանի անվտանգության ապահովման վերաբերյալ նրա բոլոր պնդումներն ու մտավախությունները պետք է դառնան մանրամասն քննարկման առարկա և հաշվի առնվեն քրեակատարողական հիմնարկի վարչակազմի կողմից: Տեղաբաշխման հարցը լուծելիս պետք է պատշաճ կերպով հաշվի առնվի նաև համատեղելիության հարցը: Բարձրացված է նաև նրա պահման պայմանների հարցը», - ասված է հաղորդագրությունում:

Սաֆարյանի նկատմամբ կիրառված տույժերի իրավաչափության, դրանց կիրառության իրավական հիմքերի, պատժախցում պահվելու ժամկետը լրանալուց հետո տեղաբաշխելիս խցում պահվող այլ անձանց նրա հետ համատեղելիության և անվտանգության ապահովման հարցերի առնչությամբ օմբուդսմանի աշխատակազմը համապատասխան գրություն է հասցեագրել Արդարադատության նախարարություն (ԱՆ):

«Նուբարաշեն» քրեակատարողական հիմնարկում պահվող Գևորգ Սաֆարյանի պաշտպանը հայտնել է, թե իր պաշտպանյալի պատժախցում մնալու ժամկետը լրացել է, սակայն վերջինս շարունակում է այնտեղ պահվել:

Սույն հայտարարության կապակցությամբ ՀՀ ԱՆ ՔԿՎ հանրային կապերի բաժնից տեղեկացնում են, որ Գ. Սաֆարյանի` պատժախցում մնալու ժամկետը լրացել է հուլիսի 21-ին. վերջինս դուրս է բերվել պատժախցից: Օրենսդրությամբ սահմանված կարգով Գ. Սաֆարյանը տեղաբաշխվել է համպատասխան խուց, ուր տեղափոխվելուց հրաժարվել է:

«Գ. Սաֆարյանը հրաժարվել է նաև այլ խցեր տեղափոխվել` պատճառաբանելով, թե նշված խցերում պահվող բոլոր անձանց հետ խնդիրներ ունի:

Գ. Սաֆարյանը պահվում է բավարար պայմաններով ապահովված առանձին խցում, մնացյալ դատապարտյալներից և կալանավորված անձանցից մեկուսի:

Հուլիսի 24-ին «Նուբարաշեն» ՔԿ հիմնարկի վարչակազմի կողմից օրենսդրությամբ սահմանված կարգով վերջինիս տեղաբաշխման հարցը լուծելու նպատակով Գ. Սաֆարյանին ևս մեկ անգամ առաջարկվել է տեղափոխվել իր ներկա կամ նախկին մասնաշենքի խցերից որևէ մեկը` բնականաբար հաշվի առնելով նրա համատեղելիությունն այլ անձանց հետ, ինչին Գ. Սաֆարյանը համաձայնել է»,- ասվում է ՀՀ ԱՆ ՔԿՎ հայտարարության մեջ: