Պուտինը կշարունակի «դիվանագիտական մարաթոնը»

Ռուսաստանի նախագահ Վլադիմիր Պուտինը կշարունակի Սիրիայում իրավիճակի կարգավորման «դիվանագիտական մարաթոնը»։ Այս մասին "Россия 1" հեռուստաալիքի եթերում հայտարարել է ՌԴ նախագահի մամուլի քարտուղար Դմիտրի Պեսկովը։

«Նախագահ Պուտինը ձեռնարկել է հագեցած դիվանագիտական մարաթոն։ Կարելի է ասել, որ, իհարկե, այն այսպես թե այնպես շարունակվելու է»,- ասել է Պեսկովը։

Նոյեմբերի 22-ին ՌԴ, Թուրքիայի և Իրանի նախագահներ Վլադիմիր Պուտինը, Ռեջեփ Թայիփ Էրդողանը և Հասան Ռոհանին Սոչիում անցկացրած հանդիպմանը հայտարարել են Սիրիայում ահաբեկչության դեմ պայքարում էական հաջողությունների մասին և այդ երկրում ճգնաժամի կարգավորման որակապես նոր փուլի սկզբի մասին։ Այդ գործընթացի հաջորդ քայլը պետք է լինի Սոչիում Սիրիայի ազգային երկխոսության կոնգրեսի անցկացումը։

Ինչպես հաղորդում է  ՏԱՍՍ-ը, Պեսկովը նաև հայտնել է, որ այդ հանդիպումից առաջ կայացած՝ Պուտինի և Սիրիայի նախագահ Բաշար ալ Ասադի միջև զրույցը «շատ մեծ ներդրում է արել վերջերս կայացած Սոչիի հանդիպման բավական հաջող ավարտի մեջ»։

Պուտինը հայտնել էր, որ Էրդողանին և Ռոհանիին տեղեկացրել է Ասադի հետ հանդիպման մասին՝ նշելով «Սիրիայի ղեկավարության կողմից արտահայտված ճգնաժամի խաղաղ կարգավորման սկզբունքներին հավատարմությունը, սահմանադրական բարեփոխում և ՄԱԿ-ին հաշվետու ազատ ընտրություններ անցկացնելու պատրաստակամությունը»։