Միքայել Միքայելյանը մինչև Օլիմպիական խաղերը կմասնակցի մինչև 20 տարեկանների աշխարհի առաջնությանը

 Հայաստանի դահուկասպորտի հավաքականի անդամ, պատանեկան Օլիմպիական խաղերի մասնակից Միքայել Միքայելյանը մինչ Փհենչհանի Օլիմպիական խաղերը կմասնակցի աշխարհի Մ20 տարեկանների առաջնությանը:

«Օլիմպիական խաղերից առաջ ինքնազգացողությունս հրաշալի մոտիվացված եմ: Հպարտ եմ, որ այս Խաղերում ներկայացնելու եմ իմ հայրենիքը, իմ ամբողջ պետությունը: Սակայն մինչև Հարավային Կորեայի Փհենչհան մեկնելը պետք է մասնակցեմ Մ20 տարեկանների աշխարհի առաջնությանը: Հիմա ինձ համար առաջնահերթ է այդ մրցաշարում լավ հանդես գալը»,- լրագրողների հետ զրույցում ասաց Միքայելյանը:

Միքայել Միքայելյանը Հայաստանի դահուկավազքի առաջնությունում անգերազանցելի էր և, հավաքելով համապատասխան վարկանիշային միավորները, կմասնակցի 23-րդ Ձմեռային օլիմպիական խաղերին:

Ձմեռային օլիմպիական խաղերը կկայանան Հարավային Կորեայի Փհենչհան քաղաքում փետրվարի 9-25-ը: