Հայ գործարարը Ռուսաստանում պատվիրել է սեփական որդու սպանությունը

Դեպքը տեղի է ունեցել Վոլգոգրադի մարզի Ջերզինսկի շրջանում։ Հունիսի 27-ին իրավապահ մարմինները ձերբակալել են 65-ամյա գործարար Էվրիկ Աշիգովին և նրա հանցակցին։ Աշիգովը մեղադրվում է 41-ամյա որդու սպանությունը պատվիրելու մեջ, որի համար մարդասպաններին 800 հազար ռուբլի է տվել, հաղորդում է «Կոմսոմոլսկայա պրավդա» թերթը՝ հղում անելով ՌԴ իրավապահ մարմինների տարածած հաղորդագրությանը։

Ըստ ՌԴ քննչական կոմիտեի՝ պատճառը եղել է այն, որ ավտոմասերի մեծածախ վաճառքով զբաղվող Աշիգովին պատկանող «Տեմպ–Լադա» ընկերությունը որդու պահանջով երկու մասի է բաժանվել։ Այնուհետև Աշիգովի որդու բիզնեսը գնալով զարգացել է, ինչի պատճառով որդուց 2 միլիոն ռուբլի հավելյալ գումար է պահանջել գործարքի համար։ Սակայն որդին հրաժարվել է գումարը վճարել։ Այսպիսով, Աշիգովը դիմում է հանցավոր աշխարհում կապեր ունեցող իր ծանոթներից Յակով Հարությունովին՝ որդու սպանությունը կազմակերպելու համար։ Վերջինս երկու մարդասպան է վարձում, որոնք Աշիգով կրտսերին պետք է հետևեին և առանձնատնից դուրս գալու պահին սպանեին, որից հետո հետքերը մաքրելու նպատակով սեփական ավտոմեքենայի մեջ այրեին նրան։   

Սպանությունը ծրագրված է եղել հունիսի 27–ին, մինչդեռ մարդասպաններից մեկը, վտանգ զգալով, որ սպանությունից հետո իրենց նույնպես կվերացնեն, հրաժարվել է այն իրագործելուց և դիմել է իրավապահ մարմիններին։ 

Աշիգովը, Հարությունովը և մարդասպաններից Վալերի Բելոգլազովան ձերբակալվել են, նրանց նկատմամբ հարուցվել է քրեական գործ։ Նրանց սպասվում է առավելագույնը 20 տարվա ազատազրկում։