Պուտինին աղաչում են կայսր դառնալ

Չորեքշաբթի «Аргументы и факты»-ում տեղի է ունեցել մամլո ասուլիս բավական տարօրինակ խորագրով՝ «Ռուսաստանը փրկելու անհապաղ խորհուրդներ Վլադիմիր Պուտինին. Կլինի՞ արդյոք Ռուսաստանը գերտերություն»։ Ըստ այդմ, Երկրաքաղաքական խնդիրների ակադեմիան (ԵԽԱ) հրատարակել է մի գիրք՝ «Անհապաղ խորհուրդներ Պուտինին»։ Գրքի շնորհանդեսը կայացել է սև-դեղին-սպիտակ եռագույնի ներքո։ Ակադեմիայի 2 փոխնախագահները փորձել են մամլո ասուլիսի մասնակիցներին բացատրել, որ դրոշը ազգայնականության հետ ոչ մի կապ չունի, և այս է Ռուսական կայսրության իրական խորհրդանիշ դրոշը, իսկ ներկայինը «առևտրային և վլասովյան դրոշ է»։

Սակայն առևտրային դրոշի փոփարինումը կայսերական դրոշով, ինքնին հասկանալի է, նախագահին ուղղված գլխավոր խորհուրդը չէր։

Հիմնական գաղափարը Ռուսական կայսրության վերականգնումն էր մինչհեղափոխական սահմաններում։ Երկրաքաղաքական խնդիրների ակադեմիայի փոխնախագահ Վլադիմիր Վոլոժանինի խոսքերով, կայսրության մեջ ուրախությամբ կընդգրկվեն բոլոր սլավոնական երկրները, այդ թվում՝ հեռավոր Սլովենիան ու Չերնոգորիան։ Ավելին, Մոսկվայի տիրակալության տակ դեմ չեն վերադառնալ նախկին ԽՍՀՄ-ի երկրները և, չգիտս ինչու, Մոնղոլիան։

Գիրքն այդպես էլ կոչվում է՝ «Ռուսական նոր կայսրության տեսության հիմնահարցեր»։ Այստեղ Պուտինին ուղղված հրատապ խորհուրդները ներկայացված են 287 էջով։ Գիրքը հրատարակվել է 3000 օրինակով, այժմ արագ թարգմանվում է 12 լեզուներով, որպեսզի աշնանից սկսի տարածվել աշխարհով մեկ։

Գրքի հեղինակների կարծիքով, «այն լիբերալ քաղաքական գիծը, որ իրականացնում է իշխանությունը, փակուղի է տանում», «իշխանությունն ինքն էլ չգիտի՝ ուր գնալ»,- հայտարարել է ԵԽԱ փոխնախագահ, գնդապեստ, փիլիսոփայական գիտությունների թեկնածու Վլադիմիր Պետրովը։

Սակայն երկու Վլադիմիրներն էլ գիտեն՝ ուր գնալ, և առաջին հերթին անհրաժեշտ է, որ Պուտինն իրեն կայսր հռչակի։ Նա պետք է կառավարի ոչ թե Մեդվեդևի, այլ պատրիարքի հետ համատեղ։ Երբ նախագահը հայտարարի «Ռուսական կայսրության ստեղծման և դրված նպատակների մասին», շրջակա երկրներն ամեն ինչ կանեն դրանում տեղ գտնելու համար։

Գրքի հեղինակների կարծիքով, միայն նման «վերադարձն արմատներին» կփրկի երկիրը, հակառակ դեպքում Ռուսաստանը կկործանվի, «այն կվերածվի բենզալցակայանի»։ Սակայն պուտինյան ռեժիմն առանց կայսրության նմանապես դատապարտված է։ «Ոչ մի նարնջագույն հեղափոխություն Ռուսաստանում չի լինելու, կլինի ռուսական անիմաստ և անխնա բունտ, և կլինի շատ շուտով»,- ահազանգել է Վլադիմիր Պետրովը։

Իր խոսքերով, նա հաճախ է լինում մարզերում, ուր Մոսկվային բոլորովին չեն սիրում։ «Հեռավոր Արևելքում արդեն բացահայտ ասում են, որ ավելի լավ է չինացիների հետ, քան մոսկվացիների, իսկ Կովկասն ընդհանրապես ապրում է մեկուսացված կյանքով»։

Մի խոսքով, Ռուսաստանը կանգնած է գրեթե կործանման եզրին, ընդ որում դա են ցանկանում նաև արտաքին ուժերը։ Վլադիմիր Վոլոժանինն անգամ ասել է, թե ինչպես։ Ամեն ինչ շատ պարզ է. «ով իշխում է Եվրասիայի կենտրոնին, տիրում է աշխարհին»։ Իսկ դա, ըստ բանախոսի, ցանկանում են գրեթե բոլորը։

Բացի այդ, ասուլիսի մասնակիցները զգուշացնում են, որ «համաշխարհային անդրկուլիսյան ուժերը ձգտում են կա՛մ մեծ պատերազմի, կա՛մ մեծ վերբեռնման»։ Նրանք խոստանում են, որ կլինի մեծ շոու՝ դուրս կմղվեն դոլարն ու եվրոն»։ Չպարտվելու համար, իբր, Ռուսաստանը պետք է շուտափույթ կերպով կայսրություն դառնա»։