«Բավակա՛ն է ժողովրդին դարձնեք իր լուսավոր ապագան փնտրող եւ միայն Ձեզ հետ առաջնորդվող խաղալիք»

Գրիշա Սանդալյանը իր ֆեյսբուքյան էջում գրել է.

«Ժողովուրդը չի հաղթել ոչ երեկ, ոչ այսօր եւ ոչ էլ վաղը։ Հաղթել եք դո՛ւք, պարո՛ն Փաշինյան։ Իսկ  եթե ցանկանում եք, որ իսկապես հավատանք, որ ժողովուրդն է հաղթել, ուրեմն հաշվի առեք ժողովրդի կարծիքը, այն է՝ վերանայեք ձեր խեղաթյուրված կադրային քաղաքականությունը եւ երբեմն պաշտոններ շռայլելուց համաձայնեցրեք ձեր որոշումները ժողովրդի հետ։ Դա կլինի իրական ժողովրդական հաղթանակ։

Աշխարհում բոլոր իշխանավորները իշխանության հասնելու համար միշտ էլ իրենց սեփական իշխանության հաղթանակը վերագրել են ժողովրդին, այդ նույն մոտեցումը մենք տեսել ենք նաեւ մեր այս 27 տարիների անկախության ընթացքում։ Անհերքելի փաստեր են։ Սակայն այս ամենը, ցավոք սրտի, մեր իրականության սահմաններում է։ Բավական է շոյեք ժողովրդի զգացմունքը։ Ես ձեզ հավատացել եմ եւ նվիրվել եմ ձեր արդար գործին ձեր շարժման առաջին վայրկյաններից, այդ ամենը բարձրաձայնել եմ ամենուրեք, բայց այսօր ես մի տեսակ հուսահատվել եմ։ Ձեր կողմից շատ ու շատ կայացրած որոշումների պատճառով։

Սակայն այն դեռ արթնանալու եւ նորից հավատալու իր պայմանն ունի. բավական է ժողովրդին դարձնեք իր լուսավոր ապագան փնտրող եւ միայն ձեզ հետ առաջնորդվող խաղալիք։ Այդ խաղը շատ խորն է եւ իմաստալից։ Պատկերացնո՞ւմ եք՝ եթե օրերից մեկ օր չկարողանաք արդարացնել իր լուսավոր ապագան ձեզ հետ կապող, առանց այն էլ՝ այսքան խաբված ժողովրդի հույսերը, պատերացնո՞ւմ եք՝ որն է լինելու ձեր դերը այս կյանքում։

Աշխարհի այս խառնաշփոթ իրականության մեջ ավելի խառնաշփոթ մի սարքեք մարդկային տանջված եւ վհատված կյանքերը.դուք չունեք այդ իրավունքը։ Եթե դուք իրոք վստահեցնում եք, որ եկել է ժողովրդի իշխանության ժամանակաշրջանը , ուրեմն փոխեք ձեր վերելակի ուղղությունը, այն տարեք իրոք դեպի ապագա, հերիք է, ժողովուրդը ապրել է ուզում, իսկ մենք օտարության մեջ բախտ որոնողներս՝ վերադարձ»։