Բունդեսթագն ընդունեց Գերմանիայի համար ռեկորդային 2019 թվականի պետբյուջեն

Բունդեսթագը նոյեմբերի 23-ին Գերմանիայի 2019 թվականի պետական բյուջեն ընդունել է 356,4 մլրդ եվրո ծավալով, ինչը գրեթե 13 միլիարդով ավելի է, քան 2018 թվականին: Քվեարկության հեռարձակումն իրականացվել է ԳԴՀ-ի խորհրդարանի կայքում:

Բյուջեի օգտին քվեարկել է 366 պատգամավոր, հիմնականում՝ կառավարող կոալիցիայից (Քրիստոնեադեմոկրատական եւ Քրիստոնեասոցիալական միությունների դաշինքը, ինչպես նաեւ Գերմանիայի սոցիալ-դեմոկրատական կուսակցությունը): Դեմ են արտահայտվել 284 խորհրդարանականներ: Ձեռնպահ չի եղել: Կոալիցիան պլանավորում է հաջորդ տարի ավելացնել ծախսերը, ամենից առաջ սոցիալական կարիքների, թվային տեխնոլոգիաների զարգացման, ընտանիքների աջակցման, զարգացմանն օժանդակելու, ինչպես նաեւ պաշտպանության համար:

ԳԴՀ-ի ռազմական բյուջեն 2019 թվականին կաճի մինչեւ 43,2 մլրդ եվրո՝ ընթացիկ տարվա 38,5 մլրդ եվրոյից (աճը՝ 12 տոկոս): Լրացուցիչ միջոցները նախատեսվում է ուղղորդել նոր ռազմանավերի, ինչպես նաեւ փոխադրական ուղղաթիռների գնմանը: ՆԱՏՕ-ի՝ 2014 թվականի սեպտեմբերին Ուելսում կայացած գագաթնաժողովում դաշինքի բոլոր երկրների ղեկավարները պարտավորություն են ստանձնել պարտադիր կարգով տասը տարվա ընթացքում իրենց ռազմական ծախսերը հասցնել ՀՆԱ-ի 2 տոկոսից բարձր նշագծի, հաղորդել է ՏԱՍՍ-ը: