Հարձակվել են Գագիկ Համբարյանի վրա

Շիրակի պետական համալսարանի դասախոս, քաղաքագետ Գագիկ Համբարյանն ահանզագում է, որ նախօրեին հարձակում է տեղի ունեցել իր նկատմամբ:

Այս առնչությամբ, նա ֆեյսբուքյան իր էջում գրել է.

«Հայտարարություն հանցագործության մասին

Դեկտեմբերի 4-ին, ժամը 09.30-ի սահմաններում Գյումրի քաղաքի Հաղթանակի պողոտայի եւ Մայակովսկու փողոցի հատման վայրում՝ նակին «Կանգառ» խանութի մոտ, հարձակման եմ ենթարկվել Շիրակի պետհամալսարանի անգլերեն լեզվի եւ գրականության ամբիոնի վարիչ, Սահակ Մինասյանի ֆան-ակումբի կարկառուն ներկայացուցիչ Անահիտ Հովհաննիսյանի եղբոր՝ Ռաֆիկ Հովհաննիսյանի կողմից, որը, անակնկալի բերելով ինձ եւ այդ բանուկ վայրում գտնվող բազմաթիվ մարդկանց, այլանդակ հայհոյանքներ ուղղելով իմ եւ ընտանիքիս անդամների հասցեին՝ հարձակվեց ինձ վրա եւ մարմնական վնասվածքներ պատճառեց:

Այս խուլիգանության եւ ինձ մարմնական վնասվածքներ պատճառելու վերաբերյալ հայտարարություն եմ տվել ոստիկանության Գյումրի քաղաքի «Կումայրի» բաժնում:

Հիշեցնեմ, որ Անահիտ Հովհաննիսյանը, ում բազմաթիվ մարդկանց ներկայությամբ նրա կուռք Սահակ Մինասյանը «12 բալանի գիժ» էր անվանում, որեւէ խնդիր չունենալով իմ եւ Հ. Խորիկյանի հետ, դարձավ ՇՊՀ-ի նախկին ռեկտորի հանցակիցը՝ մեծ ուրախությամբ ընդգրկվելով տխրահռչակ նախկին ռեկտորի ապօրինաբար ստեղծած Էթիկայի հանձնաժողովի աշխատանքների մեջ:

Հավելեմ, որ Անահիտ Հովհաննիսյանը բազմիցս է բուհի աշխատակիցների մոտ պարծեցել, որ իր եղբայրը՝ Ռաֆիկ Հովհաննիսյանը, դանակը գրպանը ման է գալիս մեր թաղում՝ ինձ սպանելու նպատակով: Այդ հայտարարություններին ես միշտ վերաբերվել եմ հումորով, սակայն Անահիտ Հովհաննիսյանը շատ ճիշտ է, որ իր եղբայրը պոտենցիալ հանցագործ է, ինչի վերաբերյալ ապացույցը՝ դեկտեմբերի 4-ին եղբոր խուլիգանական արարքն է իմ անձի նկատմամբ»: