Կրասնոդարի երկրամարզի Կրիմսկ քաղաքի էլեկտրամատակարարումը վերականգնվել է

Կրասնոդարի Կրիմսկ քաղաքի էլեկտրամատակարարումը վերականգնվել է, հաղորդում է Ռիա Նովոստի գործակալությունը՝ հղում անելով Ռուսաստանի Արտակարգ իրավիճակների նախարարության Հարավային տարածաշրջանային կենտրոնին։ Փրկարարները հաղորդել են ջրհեղեղից տուժած տարածքներում գործողությունների ակտիվ փուլի ավարտի մասին։ Գելենջիկում, Նովոռոսիյսկում ու Կրիմսկում ջրահեռացման աշխատանքներ են իրականացվել 2918 տներում։

Միևնույն ժամանակ, «Ինտերֆակսը»՝ հղում անելով Ռուսաստանի ԱԻՆ-ին հաղորդում է, որ Կրիմսկում առանց էլեկտրականության մնում է 17,600 մարդ։ Երեքշաբթի օրվա առավոտվա տվյալներով, Կրիմսկում առանց գազամատակարարման է 28,000 մարդ, առանց ջրամատակարարման՝ 2000 մարդ։

ԱԻՆ-ի տարածաշրջանային կենտրոնի տվյալների համաձայն, Կրիմսկում առանց գազի է մնացել 418 տուն, և բացի այդ, չի վերականգնվել ջրամատակարարումը 2 բնակելի համայնքներում, որտեղ առանց ջրի մնացել է 2400 մարդ։

«Ինտերֆակսը» հայտնում է նաև, որ փրկարարական աշխատանքների արդյունքում փրկվել է 872 մարդ, ջրհեղեղված բնակավայրերից էվակուացվել է 2854 մարդ, 1000 մարդ տեղափոխվել է շամանակավոր բնակեցման կացարաններ՝ կառուցված աղետի գոտում։ Երեքշաբթի օրվա առավոտվա տվյալներով, այստեղ գտնվում է 767 մարդ, իսկ մյուս տուժածները տեղավորվել են հարազատների մոտ։ Գործակալության տեղեկությունների համաձայն, աղետի գոտում հիմնահատակ քանդվել է 400 տուն։ Ամբողջովին իրենց ունեցվածքից զրկվել է 29,000 մարդ։

Փրկարարների նոր տեղեկությունների համաձայն, հուլիսի 7-ի գիշերը Կրասնոդարի երկրամասում տեղի ունեցած ջրհեղեղի արդյունքում հեղեղվել է 7200 տուն, այլ ոչ 5000, ինչպես հաղորդվել էր նախկինում, տուժել է 34,650 մարդ։ Զոհերի թիվն այս պահին անփոփոխ է՝ 171 մարդ, որից 5-ը մահացել են էլեկտրահարումից։

ԱԻՆ-ի ղեկավար Վլադիմիր Պուչկովի տեղեկություններով, Կուբանի տուժածների ապահովման համար նախարարության 10.000 աշխատակիցների կողմից աշխատանքներ են իրականացվում։