Պուտինը Մաքսային միության ընդլայնումով հակակշիռ է տեսնում Եվրամիությանը. The Moscow Post

Այս գիշեր ավարտված Յալթայի կոնֆերանսի ընթացքում Ռուսաստանի և Ուկրաինայի նախագահները հաստատել են երկկողմ համագործակցությունն ավելի ընդլայնելու և երկարաժամկետ զարգացման ծրագրեր իրականացնելու համատեղ փաստաթղթերի մի մեծ փաթեթ։ Բացի այդ, առաջ է քաշվել Ուկրաինայի անդամակցության հարցը Մաքսային միությանը, գրում է The Moscow Post–ը։

Միևնույն ժամանակ, կոնֆերանսի ամենակարևոր ձեռքբերումը եղել է երկու երկրների միջև Ազովի և Սև ծովի ջրային սահմանի հստակեցումը։ Բացի այդ Ռուսաստանը և Ուկրաինան փաստաթուղթ են ստորագրել միջուկային էներգիայի ոլորտում համատեղ հոլդինգ ստեղծելու վերաբերյալ, ինչպես նաև ստորգրվել է ռուս–ուկրաինական ռազմավարական համագործակցության վերաբերյալ հռչակագիր։

Երկու երկրների նախագահների հանդիպման առանցքային թեմաներից է եղել այսպես կոչված «գազային հարցը»։

«Մենք պայմանավորվել ենք կառավարության և նախագահի մակարդակով, ինչը նոր լիցք կհաղորդի երկու երկրների տնտեսավարող սուբյեկտներին՝ մասնավորապես ուկրաինական «Նավթոգազ» ընկերությանը, ինչի արդյունքում ընկերությունները հնարավորություն կունենան քննարկել համագործակցության բոլոր հնարավոր միջոցները էներգետիկ ոլորտում, այդ թվում նավթի և գազի», – ասել է Ռուսաստանի նախագահ Վլադիմիր Պուտինը:

Իհարկե, հանդիպման կարևոր թեմաներից է եղել Մաքսային միությանը Ուկրաինայի անդամակցության հարցը։

Կիևն ինքն է առաջարկում Ուկրաինայի տնտեսության ինտեգրում միությանը։ Այդ առնչությամբ Պուտինն ուկրաինացի գործընկերոջն առաջարկել է գործնական քայլերի դիմելուց առաջ լավ կշռադատել։

«Ամեն դեպքում, Ռուսաստանը կամ մյուս գործընկերները որևէ մեկին չեն պարտադրում ինտեգրվել Մաքսային միությանը։ Յուրաքանչյուր երկիր ինքնուրույն է որոշում այս կամ այն կազմակերպության բոլոր դրական և բացասական կողմերը։ Օրինակ Բելառուսի ՀՆԱ–ն 16%–ով աճել է Մաքսային միությանն անդամակցելուց հետո։ Այնուամենայնիվ կա մի առանձնահատկություն, որը կարևոր է նշել։ Եվրոպական միությանն անդամակցելու գործընթացը տարիներ է տևում՝ կնքվում են համաձայնագրեր։ ԵՄ–ին ինտեգրվելու ճանապարհը շատ դժվար է յուրաքանչյուր երկրի համար, եթե ոչ անհնար», – ասել է Պուտինը։

Բացի այդ Ուկրաինան և Ռուսաստանը պայմանավորվել են շարունակել Ղրիմում Սևծովյան նավատորմի ներկայության և դրա ժամկետների վերաբերյալ բանակցությունները, եզրափակում է պարբերականը։