«Տաշիրը» 4 միլիոն քառակուսի մետր բնակարաններ կկառուցի «նոր» Մոսկվայում և մերձմոսկովյան շրջանում

«Տաշիր» ընկերությունների խումբը երեք նոր նախագիծ է մշակում մերձմոսկովյան շրջանում և «նոր» Մոսկվայի տարածքում, որոնք ընդհանուր դրությամբ 4 միլիոն քառակուսի մետր բնակարանների շինարարություն են ենթադրում, երեքշաբթի ՌԻԱ Նովոստիին տված հարցազրույցում ասել է խմբի փոխնախագահ Իգոր Բուլատովը։

«Դրանցից մեկը մոտ 3 միլիոն «քառակուսի» է և երկուսը՝ 500 հազարական քառակուսի մետր»,- պարզաբանել է գործակալության զրուցակիցը։

Միաժամանակ ըստ նրա, բոլոր այդ նախագծերը կիրականացվեն Մոսկվայի օղակաձև ավտոճանապարհից ավելի քան 5 կիլոմետր հեռավորության վրա»։

Բուլատովն ընդգծել է, որ այդ տարածքների զարգացման վերջնական հայեցակարգը դեռ պատրաստ չէ։

Միաժամանակ երեք նախագծերից մեկը գտնվում է «նոր» Մոսկվայում, մատնանշել է խմբի փոխնախագահը։

Ինչպես նախկինում հաղորդում էին ԶԼՄ-ները, А101 նախագծին պատկանող հողերում «Տաշիրը» պատրաստվում է Վլադիմիր Գրուզդևի (հողատեր) ընտանիքի հիմնադրամի հետ մեկտեղ 600 հազար քառակուսի մետրանոց բնակատեղի կառուցել։

Գործակալության զրուցակիցը նշել է, որ նախագիծը ամբողջական ենթակառուցվածքով, մանկապարտեզներով և դպրոցներով փակ գյուղաքաղաքի կառուցում է ենթադրում։

«Ի դեպ, մենք ավելի շուտ ենք ներգրավվել այդ նախագծում, քան միավորված տարածքների մասին խոսակցություններն էին սկսվել, և ինտուիցիան մեզ չխաբեց: Այժմ այդ տարածքն ավելի գրավիչ է դարձել»,- ընդգծել է Բուլատովը։

Միաժամանակ նա մատնանշել է, որ ընկերությունը չի շտապում իրականացնել այդ նախագիծը, հանձնման հստակ ժամկետներ դեռ չեն հաստատվել։

Բուլատովը տեղեկացրել է նաև, որ այս տարի ընկերությունն արդեն նախատեսում է հանձնել Մոսկվայում իրականացվող նախագծերը՝ «Գազոյլ-Սիթի»-ն և «Դիրիժաբլ»-ը, որտեղ ներկա պահին ավարտվում են հարդարման աշխատանքները և մեկնարկում է վաճառքը։

«Տաշիր» խումբը ստեղծվել է 1999-ին։ 2004-ին ընկերությունը դուրս է եկել զարգացման և առևտրային անշարժ գույքի մոսկովյան շուկա։

«Տաշիրը» զբաղվում է բնակարանների, վարչական և արտադրական շենքերի, առևտրային-զվարճության և բիզնես կենտրոնների, հյուրանոցների, լոգոկենտրոնների, ճանապարհների, գազատարների և այլ օբյեկտների նախագծմամբ և շինարարությամբ։

INFOLine ընկերության հետազոտության համաձայն, 2011-ին ՌԴ-ում «Տաշիրը» առևտրային տարածքների ծավալով երկրորդ տեղն է զբաղեցրել առևտրային կենտրոնների սեփականատերերի շրջանում ՝ գրեթե 1,19 միլիոն քառակուսի մետր արդյունքով։

Խմբում նաև ընդգրկված է «Մեր տուն» հիպերմարկետի ցանցը, «Գրանդֆուդ» ռեստորանների ցանցը, «Սինեմա-սթար» կինոցանցը և «Կասկադ» էներգետիկ հոլդինգը։ «Տաշիրի» բիզնեսը համախմբում է ավելի քան 200 ընկերություն, իսկ խմբի աշխատակիցների ընդհանուր թիվը գերազանցում է 40 հազարը։ Ընկերության հիմնական սեփականատերը Սամվել Կարապետյանն է։