Մեր ֆուտբոլիստները բնավորություն և կամք դրսևորեցին. Կարեն Բարսեղյան

Հայաստանի ֆուտբոլի Մ18 հավաքականի գլխավոր մարզիչ Կարեն Բարսեղյանի կարծիքով ընտրանին 0:3 հաշվով պարտվելուց հետո կարողացավ բնավորություն ցույց տալ:

«Կարծում եմ՝ խաղի դիտարժանությունը շատ բարձր էր: Մենք ինքներս մեզ համար շատ լուրջ խնդիրներ ստեղծեցինք խաղասկզբում, բայց փառք ու պատիվ տղաներին, որ բնավորություն ցույց տվեցին ու կարողացան դուրս գալ այս իրավիճակից: Ես ինքս հասկանում եմ, թե որքան ծանր է նման գոլեր բաց թողնելը և հետո խաղի ընթացքը բեկելը»,- Հայաստանի Մ-18 հավաքականի գլխավոր մարզիչ Կարեն Բարսեղյանի խոսքերը փոխանցում է ՀՖՖ-ն:

Մարզչի խոսքով՝ հավաքականը երկու տարբեր խաղակեսեր անցկացրեց: «Առաջին կեսում փորձում էինք ագրեսիվ խաղալ, բայց բաց թողած գոլը խառնեց մեր պլանները: Դրանից հետո ունեինք գոլ խփելու ռեալ հնարավորություն, որը չկարողացանք օգտագործել: Երկրորդ գոլը շատ անհարմար պահի ընդունեցինք՝ երկրորդ կեսի մեկնարկում: Դա շատ ծանր հոգեբանական պահ է, մանավանդ 17-18 տարեկան ֆուտբոլիստների համար: Դրա համար ես շատ գոհ եմ, որ նրանք չկորցրեցին հավատը նույնիսկ 3-րդ գոլը ընդունելուց հետո»,-ասել է նա:

ՀՖՖ տեխնիկական կենտրոնում՝ Ֆուտբոլի ակադեմիայում, կայացավ Հայաստանի և Կիպրոսի Մ-18 հավաքականների ընկերական հանդիպումը: Խաղն ավարտվեց ոչ-ոքի՝ 3:3 հաշվով: