Հուլիսի 14-ին ջավախահայերը վերստին մեծարեցին աշուղ Ջիվանուն

Սամցխե-Ջավախք նահանգի Ախալքալաքի շրջանի Կարծախ գյուղի բնակչությունը տասնամյակներ շարունակ արժանին մատուցելով հայ մեծ աշուղ Ջիվանու հիշատակին, հուլիսյան օրերից մեկը ավանդաբար նվիրում է իր զավակի երգի ու երաժշտության մեծարմանը:

Հուլիսի 14-ին Մեծն Ջիվանու ավանդական տոնին մասնակցում էին ՀՀ Սփյուռքի նախարար Հրանուշ Հակոբյանը, նախարարության աշխատակազմի ԱՊՀ հայ համայնքների վարչության Կովկասի բաժնի պետ Տարոն Շագոյանը, Սամցխե-Ջավախքի նահանգապետ Վանո Ծիկլաուրին, Վրաստանում ՀՀ արտակարգ և լիազոր դեսպան Հովհաննես Մանուկյանը, պետական գործիչներ ինչպես Վրաստանից, այնպես էլ Հայաստանից, մտավորականության և արվեստի ներկայացուցիչներ:

Այս տարի Ջիվանու (Սերոբ Ստեփանի Լևոնյան) ավանդական մեծարման օրը բնակչության համար կրկնակի տոնական էր: Հիշատակի օրվան նախորդեց Կարծախի Սուրբ Հովհաննես Կարապետ եկեղեցու վերաօծման արարողությունը: Եկեղեցու վերաօծման սրբազան արարողությունը սկսվեց «Դռնբացեքի» արարողությամբ: Վիրահայոց թեմի առաջնորդ, Գերաշնորհ Տեր Վազգեն եպիսկոպոս Միրզախանյանի ձեռամբ վերաօծվեցին եկեղեցու 16 սյուները, Սուրբ խորանը, մկրտության ավազանը և սրբապատկերները:

Հուլիսի 14-ի առավոտյան՝ Սուրբ Պատարագից առաջ, պատվարժան հյուրերը Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի, Սամցխե-Ջավախքի առաջնորդական փոխանորդ Բաբգեն աբեղա Սալբիյանի և ժողովրդի ուղեկցությամբ ծաղիկներ դրեցին Ջիվանու հուշարձանին:

Նորաօծ եկեղեցու բակում հավաքված բազմությանը ողջույնի խոսքով դիմեցին ՀՀ Սփյուռքի նախարար Հ.Հակոբյանը, Ախալքալաքի շրջանային ժողովի նախագահ Հ.Մովսիսյանը և Բաբգեն աբեղա Սալբիյանը: Նորաօծ եկեղեցու Սուրբ Սեղանի օծմանը և անդրանիկ Սուրբ Պատարագի մատուցմանը հաջորդեց հրապարակախոս ու փիլիսոփա, բարոյագետ ու երգաստեղծ աշուղ Ջիվանու մեծարմանը նվիրված տոնահանդեսը և վերստին տարածվեց նրա երգն ու երաժշտությունը՝ վարպետ և ինքնագործ երգիչների և համույթների կատարմամբ: