«Կառավարությունը որոշումն անցկացրեց գաղտագողի». ինչո՞ւ է տարածքն արտոնյալ պայմաններով տրվում արտասահմանյան ՍՊԸ-ին

«Կարծում եմ, որ կառավարության որոշումը պիտի չեղարկվի և հաշվի առնվի կոլեկտիվի շահերը»,- այս մասին կառավարության դիմաց հայտարարեց տնտեսագետ Սուրեն Պարսյանը` անդրադառնալով Մնջոյանի անվան Օրգանական և դեղագործական քիմիայի գիտատեխնոլոգիական կենտրոնի աշխատակիցների բողոքի ակցիային: Տնտեսագետի խոսքով` կենտրոնում ստեղծագործ կոլեկտիվ է աշխատում և նրանք կարող են պետությանը մեծ շահ բերել:

«Խնդիրը կայանում է նրանում, որ այս մարդկանց հնարավորություն տրվի, որպեսզի իրենց աշխատանքները կարողանան շարունակել իրենց կենտրոնում: Կառավարությունը չի բարեհաճել նաև ներկայացնել, թե կենտրոնը տեղափոխելու դեպքում ո՞վ է հոգալու ծախսերը, նրանց համար համապատասախան լաբորատորա ո՞վ է կառուցելու, որպեսզի այս մարդիկ չկանգնեն փաստի առաջ»,- ասաց Սուրեն Պարսյանը:

Տնտեսագետի խոսքով` կենտրոնի տնօրենը բացասական դիրքորոշում է հայտնել մասնաշենքի առաջին և երկրորդ հարկերը ևս «Ազադ» ՍՊԸ-ին հանձնելու համար, սակայն նրա այդ դիրքորոշումը վերջնական եզրակացության մեջ տեղ չի գտել, նույնիսկ հատուկ կարծիքի ձևով: Սուրեն Պարսյանը նշեց, որ իր կարծիքով, կենտրոնի տնօրենի կարծիքը պարզապես անտեսվել է, և ինքն այս խնդիրը բարձրացրել է նաև կառավարության անդամների մոտ: ԼՈւՐԵՐ.com-ի հարցին, թե ինչ արձագանք է ստացել, տնտեսագետը պատասխանեց.

«Առաջին անգամ, երբ հարցը բարձրացվել է, այն դուրս է եկել օրակարգից: Այս անգամ, կառավարությունը կենտրոնի մասնաշենքը վարձակալության հանձման կետը ներառեց չզեկուցվող հարցերի մեջ և որոշումն անցկացրեց գաղտագողի»,-ասաց տնտեսագետը` հավելելով, որ «Ազադ» դեղագործական ՍՊԸ-ին, մասնաշենքի երրորդ հարկը տրամադրված է 800. 000 դրամով, բայց մյուս երկու հարկերի ավելացման դեպքում արդեն վճարելու են 1. 200.000 դրամ: Տնտեսագետի պնդմամբ , այստեղ հարց է առաջանում, թե ինչո՞ւ է արտոնյալ պայմաններով տարածքը տրվում արտասահմանյան «Ազադ» ՍՊԸ-ին, եթե կան բազմաթիվ այլ դեղագործական ընկերություններ, որոնք տարածքների կարիք ունեն:

Սիլվի ՏԻԳՐԱՆՅԱՆ