Պարոն Քոչարյանի նկատմամբ այս պահին ցուցաբերվում է ակնհայտ խտրական վերաբերմունք՝ ապօրինի քրեական հետապնդման տեսքով. պաշտպան

Ինչպես արդեն տեղեկացրել ենք, ՀՀ Վերաքննիչ քրեական դատարանում՝ դատավոր Ռուզաննա Բարսեղյանի նախագահությամբ, այսօր՝ ապրիլի 11-ին, որոշվեց մերժել Ռոբերտ Քոչարյանի կալանավորման վերաբերյալ վերաքննիչ որոշումը։ Լրագրողների հետ զրույցում երկրորդ նախագահ Ռոբերտ Քոչարյանի փաստաբանական թիմի անդամ Հովհաննես Խուդոյանն ասաց. «Այն ժամանակահատվածի համար, երբ պարոն Ազարյանի որոշման հիման վրա հիմք ընդունելով Քոչարյանի անձեռմխելիությունը՝ վերջինս կալանքից ազատվեց, մինչև Վճռաբեկ դատարանի կողմից բեկանվելը, այդ դատական ակտը ուժի մեջ մտած էր և պետք է հիմք ընդունվեր բոլոր պետական մարմինների կողմից, սակայն վերջիններս այդ դատական ակտի պայմաններում շարունակել են քրեական հետապնդման իրականացումը՝ ինչի իրավունքը չունեին»:

Մինչև Վճռաբեկ դատարանի կողմից բեկանվելը դատական ակտը ուժի մեջ մտած էր և պետք է հիմք ընդունվեր բոլոր պետական մարմինների կողմից, սակայն վերջիններս այդ դատական ակտի պայմաններում շարունակել են քրեական հետապնդման իրականացումը՝ ինչի իրավունքը չունեին:

«Նախնական փուլում մենք չենք պնդել, որ սա քաղաքական հետապնդում է։ Առաջին օրվանից սկսած՝ պնդել ենք, որ սա իրավական հետապնդում չէ, սակայն հետագա բոլոր գործողությունները՝ թե՛ նույն գաղտնալսումները, թե՛ դատարանների նկատմամբ հրապարակային ճնշումները եկան հաստատելու, որ պարոն Քոչարյանը քաղաքական բանտարկյալ է։ Պարոն Քոչարյանի նկատմամբ այս պահին ցուցաբերվում է ակնհայտ խտրական վերաբերմունք՝ ապօրինի քրեական հետապնդման տեսքով»,-ասաց փաստաբանը։

Հիշեցնենք, որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով եւ 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու եւ առանձնապես խոշոր չափերով կաշառք ստանալու համար: