«Քարը փեշից թափեք», հարմարվեք նոր իրողություններին․ Կոտայքի մարզպետ

Կոտայքի մարզի Արամուս գյուղի Վլադիկ Առաքելյանի անվան դպրոցում կրքերը չեն հանդարտվում։ Դպրոցի բակում բողոքի ակցիան շարունակող աշխատակիցներն ու նրանց ծնողները հանդիպում են պահանջում Կոտայքի մարզպետ Ռոմանոս Պետրոսյանի հետ։ Թեև այսօր էլ սպասում էին նրան, սակայն մարզպետն այդպես էլ չայցելեց։

Ակցիայի մասնակիցները պնդում են՝ տնօրեն է նշանակվել «հեղափոխության օրերին մարզպետի հետ քայլած անձը», իսկ իրենք պահանջում են տնօրեն նշանակել փոխտնօրենին, ով իրենց համագյուղացին է։ 

ԼՈՒՐԵՐ․com-ի հետ զրույցում Կոտայքի մարզպետ Ռոմանոս Պետրոսյանն ասաց, որ որևէ մեկը հայտարարություն չի արել, որ ինքը պետք է գնար Արամուսի դպրոց․ «Իրենք խեղաթյուրում են խոսքերը։ Ես չեմ ասել, որ գնալու եմ դպրոց, այլ ծնողներին և մանկխորին եմ հրավիրել մարզպետարան՝ քննարկելու ստեղծված իրավիճակը, սակայն նրանք չեն ներկայացել։ Արամուսի դպրոցի թնջուկը կմեկնաբանեմ մեկ նախադասությամբ՝ նախկին իրողություններին սովոր որոշ քաղաքական շրջանակների և նրանց փոխկապակցված բարեկամական, ընկերական շրջապատի բոյկոտի փորձն է մեր կրթական բարեփոխումներին։ Ինչ վերաբերում է տնօրեն նշանակելուն, ապա դա մարզպետի գործառույթը չէ, տնօրեն նշանակում է փոխվարչապետը՝ հաշվի առնելով թեկնածուի գիտակրթական գործունեությունն ու մյուս առավելությունները»,- ասաց Պետրոսյանը։

Նրա խոսքով՝ բողոքի ակցիայի մասնակիցները ցանկանում են, որ Արամուսից լինի տնօրենը, բայց ըստ նրա՝ չկա իրավական նորմ, որով կրթական հաստատության ղեկավարը պարտադիր պետք է լինի տվյալ համայնքից․ «Նախկին տնօրենը ևս այդ համայնքից չի եղել, իսկ փոխտնօրենը նախկին տնօրենի հետ է աշխատել։ Այն ժամանակ տնօրենի մեկ թեկնածու է եղել, իսկ այս անգամ մի քանի թեկնածուներ և առողջ մրցակցություն է եղել»,- նշեց մարզպետը։

Անդրադառնալով խոսակցություններին, թե մարզպետն իր ծանոթին է նշանակել տնօրեն, Պետրոսյանը փորձեց հերքել, սակայն իր խոսքով ակնարկեց, որ նոր տնօրենին վաղուց է ճանաչում․ «Տվյալ ուսուցչուհին ընդամենը Աբովյանի քաղաքացի է, ով աշխատում էր այն դպրոցում, որը ես ավարտել եմ, վե՛րջ։ Չկա որևէ մտերմական կապ, անձնական հարաբերություն։ Դա նրանց և նրանց ուղղորդողների մտքի ֆանտազիան է։ Ես Աբովյանում ինձ ընտրած 20 հազար անձից 10 հազարին ճանաչում եմ անձամբ, հիմա ում ճանաչում եմ՝ իրավունք չունե՞ն իրավական ընթացակարգերով մասնակցել մրցույթների և հաղթել»,- ասաց նա։  

Մարզպետը կոչ արեց ծնողներին «քարը փեշից թափել», հարմարվել նոր իրողություններին, որտեղ օրենքի գերակայությունն է և իրենց երեխաները ավելի ազատ և երջանիկ երկրում կապրեն։

Սոնա Հարությունյան