Միջադեպ Ստրասբուրգում․ դանակով հարց լուծողները կպառկեն ասֆալտին․ Փաշինյան

Եթե որևէ մեկը փորձի դանակահարությամբ հարց լուծել, այդտեղ բոլորը կպառկեն ասֆալտին։ Այս մասին այսօր՝ ապրիլի 11-ին, Ստրասբուրգի հայ համայնքի հետ հանդիպմանը ասաց ՀՀ վարչապետ Նիկոլ Փաշինյանը՝ պատասխանելով հայ համայնքի ներկայացուցչի մտահոգությանը։

Կոտայքի մարզից Ստրասբուրգ տեղափոխված հայը, վարչապետին դիմելով, ասաց. «Կոտայքի մարզում անհրաժեշտություն կա, որ դուք արձագանքեք մարզպետի աշխատելաոճին։ Մեր գյուղում ժամանակավոր պաշտոնակատր նշանակվեց, հոկտեմբերին ընտրություններ պետք է լինեին, սակայն հետաձգվեցին մինչև փետրվար, ժողովուրդը դրան արձագանքեց որպես շինծու ձգձգում, որ տվյալ մարդը լինելով ՔՊ–ական դառնա գյուղապետ, բայց ինքը չէր կարող ձայն հավաքել, բայց անցավ մյուս փուլ։ Գյուղում ռեպրեսիաներ եղան, 4 հոգի դանակահարվեց, ավտոմատներով, մասկեքով։ Ժամանակավոր պաշտոնակատարը կռիվ է անում, ոստիկանությունում հաղորդում է տալիս։ Մարզպետին դուք պետք է նկատողություն տաք»։

Վարչապետն ի պատասխան ասաց․ «Ընտրությունները չեն հետաձգվում, արվում են փուլերով, նախկինում գյուղապետը հրաժարական էր տալիս, որոշ ժամանակ անց ընտրություններ են տեղի ունենում, հիմա ՏԻՄ ընտրությունները տեղի են ունենում տարին 2 անգամ»։

Հետո լեզվակռիվ սկսվեց  հայ համայնքի ներկայացուցիչների միջև. «Ես եկել եմ այստեղ, ձեզ խանգարո՞ւմ է։ Նոր Հայաստանում իրավունք չունե՞նք ասենք այն ինչ կա»,–զայրացած ասաց հարց տվողը, ապա հավելեց. «Ես ցավում եմ, որ իմ համայնքում դանակով հարց են փորձում լուծել և ցավում եմ, որ իմ գյուղում թշնամություն է մտել, որին Փաշինյանը արձագանքեց. «Եթե որևէ մեկը փորձի դանակահարությամբ հարց լուծել այդտեղ բոլորը կպառկեն ասֆալտին։ Բոլոր գողականները, դանակով հարց լուծողները, պպզածները կպառկեն ասֆալտին, մեր համբերությունը չչարաշահեն»։