2018թ. ընտրություններն ազատ էին, բայց ոչ արդար․ Կարո Եղնուկյան

4 Հուլիս, 2019 20:57

Հայաստանի պատմության մեջ 2018թ. ընտրություններն առաջին անգամ ազատ էին, բայց ոչ արդար: Արդարության համար թեկնածուների և կուսակցությունների համար պետք է ստեղծվեին հավասար պայմաններ, քանի որ հավասարությունն է ապահովում արդարությունը: Այս մասին ԼՈՒՐԵՐ․com-ի հետ զրույցում ասաց «Հիմնադիր խորհրդարանի» անդամ Կարո Եղնուկյանը՝ նշելով, որ 2018թ․ ընտրություններն անցկացնելու առումով նոր իշխանությունները շտապեցին։

Նրա խոսքով՝ այն քաղաքական, կուսակցական դաշտը, որտեղ եղել են արտոնյալներ, իշխանավորներ, որոնք չարաշահել են իրենց դիրքերը, իրենց կուսակցություններին առաջ են մղել մյուսների կորուստների հաշվին դառնում է անհավասարություն․ «Դա այն է, երբ կապում են մեկի ձեռքերը և ազատ են թողնում՝ մյուսինը։ 30 տարի այս վիճակն է եղել ու թեև 2018թ․ առաջին անգամ ընտրություններն ազատ էին, բայց դա բավարար չէր, որովհետև այս անգամ էլ արդարությունն ապահովված չէր։ Նոր իշխանությունը, որը պարտավոր էր այդ ուղղությամբ քայլեր անել, չարեց»,- ասաց նա՝ նշելով, որ դրա համար ընդամենը պետք էր քաղաքական կամք, իսկ իրագործելը շատ հեշտ էր։

Ըստ Եղնուկյանի՝ արդարություն ապահովելու համար նոր իշխանությունից պահանջվում էր ընտրություններից առաջ նոր սահմանադրության ընդունում, ընտրական օրեսգրքի և կուսակցությունների մասին օրենքների փոփոխություն․ «Ընտրությունների մասնակիցների համար հավասար պայմաններ ստեղծելու համար առաջին հերթին պետք է բոլոր կուսակցությունները լուծարվեին, երկրորդը՝ նոր օրենսգրքով կուսակցությունները վերագրանցվեին։ Պետությունը պետք է բոլոր կուսակցություններին հավասար հարթակ տրամադրեր։ Երրորդ՝ այն կուսակցություններին, որոնք մասնակցել էին նախորդ հանցավոր ռեժիմի կառավարմանը, պետք է արգելվեր մասնակցել մոտակա 2 ընտրություններին՝ այսինքն 10 տարվա մեջ։ Նրանք կարող էին վերագրանցվել, բայց իրավունք չունենալ մասնակցել ընտրություններին։ Խոսքը 4 կուսակցությունների մասին է՝ ՀՀԿ, ԲՀԿ, ՀՅԴ և ՕԵԿ։ Չորրորդ՝ կուսակցությունների ունեցած գույքը պետք է պետականացվեր, եթե ձեռք էր բերվել կոռուպցիոն ճանապարհներով, այսինքն կկտրվեր ֆինանսական աղբյուրը և, երբ բոլոր կուսակցությունները ֆինանսապես 0-ի բերվեին, պետությունը կուսակցություններին տրամադրեր հավասար պայմաններ․ լիներ գրասենյակային տարածք, որտեղ բոլոր կուսակցությունները մեկ շենքում կունենային տարածքներ, հանրային հեռուստատեսությամբ ու ռադիոյով ազատ ժամ՝ արտահայտվելու համար, գրպանի ծախսերի համար գումար, մամուլի ասուլիսների հավասար պայմաններ»,- ասաց նա։

Եղնուկյանն այն կարծիքին է, որ Նիկոլ Փաշինյանն ընտրություններից առաջ պետք է հայտարարեր, որ էյֆորիայի տակ պետք չէ «Քաղաքացիական պայմանագրի» անդամ դառնալ, քանի որ նրանց շարքերում շատ ՀՀԿ-ականներ կան, որոնք տեսնում են՝ որտեղ ծանր է, այնտեղ են գնում․ «Փաշինյանն անձամբ պետք է կանխեր դա, զսպեր ժամանակավոր էյֆորիան, քանի որ հենց հեղափոխության ժամանակ ուներ բավարար անդամներ։ Ինչու ժամանակավոր, քանի որ եթե հիմա ընտրություններ լինեն խորհրդարանում հաստատ 70% ձայն չեն ունենալու։ Կարծում եմ 50%-ից ավել կլինի, բայց ոչ 70-ին մոտ։ Բնական երևույթ է՝ մարդիկ ուզում են իրենց ուզածը տվյալ պահին լինի, չի լինում՝ հիասթափվում են։ Հույս ունեմ՝ առաջիկայում արտահերթ ընտրությունները կլինեն նշածս ձևով։ Լավ կլինի, եթե ընտրություններն անցկացվեն Ամերիկայի օրինակով՝ 4 տարին մեկ, որտեղ պալատի կեսը ընտրվում է 2 տարի անց, բայց պատգամավորը ծառայում է 4 տարի։ Սա շատ կարևոր է, որ լճացում չլինի, որովհետև 5 տարի հետո խորհրդարանը ժամկետանց է դառնում և հարկավոր է լինում երիտասարդ մտքեր ու նոր գաղափարներ»,- եզրափակեց Եղնուկյանը։

Սոնա Հարությունյան