Արման Մկրտումյանի գործողությունների արդյունքում հնարավոր է Ռիժենկոն մահանար. պաշտպան

ՀՀ վճռաբեկ դատարանի նախկին նախագահ Արման Մկրտումյանի և նրա որդու՝ Գոռ Մկրտումյանի դեմ մահափարձի, ինչպես նաև ավազակության համար մեղադրվող Հովհաննես Ռիժենկոյի պաշտպան Արման Արզումյանը բողոք է ներկայացրել Երևան քաղաքի ընդհանուր իրավասության դատարան՝ գործը քննած ՀՔԾ քննիչի որոշման դեմ։ Բանն այն է, որ քննիչ Վոլոդյա Սիմոնյանը 2019թ. ապրիլի 3–ին որոշում է կայացրել գործով տուժողներ Արման և Գոռ Մկրտումյանների նկատմամաբ մեղադրյալ Հովհաննես Ռիժենկոյին առողջության թեթև վնասի հատկանիշներ պարունակող մարմնական վնասվածքներ պատճառելու դրվագով քրեական հետապնդում չիրականացնել՝ նրանց արարքը քրեական օրենքով իրավաչափ համարվելու հիմքով։ Նշված որոշումը փաստաբանը նախ բողոքարկել է վերահսկող դատախազին, որը սակայն մերժել է այն։ Փաստաբանը դատարանից պահանջում է վերացնել՝ քրեական հետապնդում չիրականացնելու մասին ՀՔԾ քննիչի որոշումը և որոշում կայացնել Հովհաննես Ռիժենկոյի իրավունքների և ազատությունների խախտումը վերացնելու` վարույթն իրականացնող մարմնի պարտականության մասին:

Այսօրվա դատական նիստում Արման Արզումանյանը, հրապարակելով բողոքը՝ հայտարարեց, որ քննիչի որոշմամբ սահմանափակվել է Հովհաննես Ռիժենկոյի՝ կյանքի իրավունքը, պետական մարմինների առջև պաշտպանության արդյունավետ միջոցների իրավունքը, ինչպես նաև արդար դատաքննության իրավունքը։

Փաստաբանի կարծիքով՝ նախաքննական մարմինը, նաև քրեական գործի նկատմամբ հսկողություն իրականացնող դատախազը տարբերակված մոտեցում են ցուցաբերել միևնույն դեպքի ընթացքում նույնանման արարքներ կատարած դատավարության մասնակիցների՝ տուժողի և մեղադրյալի գործողություններին իրավական գնահատական տալու հարցում: Մասնավորապես՝ մի դեպքում ծայրահեղ խիստ մեղադրանք առաջադրելով՝ հիմնվելով ենթադրությունների և սուբյեկտիվ դատողությունների վրա, մյուս դեպքում՝ օբյեկտիվ հիմք ունեցող սպանության փորձը՝ անհրաժեշտ պաշտպանություն որակելով:

«Փաստարեն Արման Մկրտումյանի կյանքի իրավունքն ավելի բարձր է որակվել, քան իմ պաշտպանյալի կյանքի իրավունքը»,–նկատեց նա։

Փաստաբանը, նկարագրելով առանձնատան բակում տեղադրված տեսանկարահանող սարքավորումների տեսագրություններով արձանագրված կադրերը, նշեց, որ սկզբում Գոռ Մկրտումյանը իր մոտ գտնվող «Վալտեր» տեսակի գազային ատրճանակով կրակում է Հովհաննես Ռիժենկոյի դեմքին, և այդ ընթացքում Արման Մկրտումյանը ինչ որ առարկայով հարվածներ է հասցնում Հ.Ռիժենկոյի մարմնի տարբեր մասերին:

«Տեսանյութից երևում է, որ ինքնաձիքն արդեն գտնվում է Գոռ Մկրտումյանի ձեռքում և դրանով հարված է հասցնում  Ռիժենկոյին։ Այնուհետև Արման Մկրտումյանը ատրճանակի բռնակով մի քանի հարվածներ է հասցնում Ռիժենկոյի գլխի շրջանում և այդ հատվածում ակնհայտ է դառնում, որ բռնության են  ենթարկվում ոչ թե Արման և Գոռ Մկրտումյանյանները, այլ Ռիժենկոն»,–հայտարարեց նա՝ նկատելով, որ իր պաշտպանյալը դարարում է դիմադրություն ցույց տալ և սկսում է պաշտպանվել։

«Տեսանյութից ակնհայտ նկատվում է, որ Հովհանես Ռիժենկոն գրեթե ուշաթափ է, չի կարողանում կառավարել մարմինը՝ կոորդինացիան կորցրել և տեսողությունը մթագնել է՝ հաշվի առնելով, որ դեմքին կրակել են գազային ատրճանակով: Նկատվում է, որ վերջինս գնում է դեպի տան ելքը, չի դիմադրում անգամ Գոռ Մկրտումյանին, տպավորություն է, որ անգամ ի վիճակի չէ փախչել: Սակայն Արման Մկրտումյանը մոտենում է արդեն իսկ անպաշտպան և բազմաթիվ վնասվածքներից հյուծված Ռիժենկոյին ու ատրճանակի բռնակով մի քանի հարվածներ է հասցնում վերջինիս գլխին»,–ասաց նա։

Փաստաբանի գնահատմամբ՝  Արման Մկրտումյանի կողմից  ատրճանակի մետաղական բռնակով Ռիժենկոյի գլխին բազմաթիվ հարվածներ հասցնելը՝  կարող էր հանգեցնել ընդհուպ մահվան:

Ըստ նրա ՝ այդ գործողությունը կատարվում է ուղղակի դիտավորությամբ և Մկրտումյանի կողմից Ռիժենկոյին հարվածներ հասցնելը պայմանավորված չէր անհրաժեշտությամբ.

«Ճիշտ հակառակը, առանց տարակուսելու, տպավորությունն այնպիսին է, որ հարվածներն անմիջականորեն ուղղված են եղել Ռիժենկոյին կյանքից զրկելուն, և հանցանքն ավարտին չի հասցվել անձի կամքին հակառակ հանգամանքներով, այն է՝ ատրճանակը ձեռքից ընկնելու հետևանքով»,–նշեց նա։

Փաստաբանի խոսքով՝ ակնհայտ է, որ  Արման Մկրտումյանի գործողությունները դուրս են եկել անհրաժեշտ պաշտպանության տիրույթից։

Արզումանյանը դատարանին միջնորդեց նաև նիստի ընթացքում հետազոտել գործում առկա տեսանյութերը: Դատարանը, սակայն, մերժեց միջնորդությունը, և տեսանյութը չհետազոտվեց:

Քննիչ Վոլոդյա Սիմոնյանն, անդրադառնալով պաշտպանի հայտնած այն մտքին, թե գուցե քննիչի ուշադրությունից որևէ հանգամանք վրիպած լինի, նշեց, որ մի քանի անգամ մանրամասն ուսումնասիրվել է տեսանյութը, որ դրանում շատ պարզ երևում է անձանցից յուրաքանչյուրի գործողությունը: Քննիչը նաև նշեց, որ Հովհաննես Ռիժենկոյի ատրճանակն, ըստ քրեական գործով ստացված փորձաքննության եզրակացության, բերված է եղել մարտական դիրքի: Ըստ Սիմոնյանի՝ Արման և Գոռ Մկրտումյանները անհրաժեշտ պաշտպանության են դիմել:

Այսպիսով դատարանը հեռացավ խորհրդակացական սենյակ՝ բողոքի վերաբերյալ որոշում կայացնելու։

Դատական ակտը կհրապարակվի հուլիսի 19–ին։