Ղազախստանում հայկական համարանիշերով ավտոմեքենաների երթևեկությունը կսահմանափակվի

Ղազախստանի Ներքին գործերի նախարար Երլան Տուրգումբաևը հայտարարել է, որ պլանավորում են սահմանափակել  հայկական, ղրղզական, ռուսական պետհամարանիշներով մեքենաների ժամանակավոր գրանցումը, հաղորդում է Tengrinews.kz լրատվականը:

«Շատ են բողոքները Հայաստանում, Ռուսաստանում և Ղրղզստանում գրանցված ավտոմեքենաների վերաբերյալ, որոնք խախտում են երթևեկության կանոնները»,- հայտնել է նախարար Տուրգումբաևը:

Նրա խոսքով` այդ համարանիշներով ավտոմեքենաների նկատմամբ ոչինչ չեն կարող անել, քանի որ դրանք գրանցված չեն Ղազախստանի տարածքում:

«Նրանք զբաղվում են ձեռներեցությամբ՝ ուղևորներ են փոխադրում։ Մենք առաջարկում ենք սահմանափակումներ և պարտադիր ժամանակավոր գրանցում մտցնել այն մեքենաների համար, որոնք մեր հանրապետության տարածքում են լինում ավելի քան 10 օր։ Եթե այն տարանցիկ է, կարող է 10 օրում հատել երկրի տարածքը։ 10 օրից հետո տրանսպորտը պետք է ժամանակավոր գրանցում ստանա։ Ինչպես նաև պետք է արգելք մտցնել Ղազախստանի Հանրապետության քաղաքացիների կողմից այդ տրանսպորտային միջոցների օգտագործման համար՝ ուղևորներ, ուղեբեռ և բեռ տեղափոխելիս»,- ասել է նախարարը։

Վարչական ոստիկանության կոմիտեում տեղեկացրել են, որ ներկայում Եվրասիական տնտեսական միության անդամ պետություններում գրանցված տրանսպորտային միջոցների պարտադիր ժամանակավոր գրանցում մտցնելու հարցը քննարկվում է պետական մարմինների և հասարակական միավորումների կողմից։ Ընդ որում՝ դրա իրականացման համար անհրաժեշտ է լրացուցիչ փոփոխություններ մտցնել «Ճանապարհային երթևեկության մասին» օրենքում։

Այս որոշումն ընդունելու դեպքում`  հարցը կքննարկվի Ղազախստանի Հանրապետության խորհրդարանում` ընթացիկ կամ հետագա օրենսդրական գործունեության սահմաններում: