«Օրենքով գող» Մերաբ Քալաշովին բռնի պահել էին «Զվարթնոց»-ում. նրան արտահանձնեցին

«Օրենքով գող» Մերաբ Քալաշովին երեկվանից պահել էին «Զվարթնոց» օդանավակայանի ոստիկանության գծային բաժնում: Վերջինիս ցանկանում էին արտահանձնել Ֆրանսիային: ԼՈՒՐԵՐ.com-ի հետ զրույցում Քալաշովի պաշտպան Արմեն Մելքոնյանը նշեց, որ իր պաշտպանյալին մի քանի ժամ չի կարողացել տեսակցել՝ անհասկանալի պատճառաբանություններով:

«Նրան առևանգել էին, չկար դատարանի որոշում: Ես անգամ չկարողացա իմ պաշտպանյալին տեսնել, քանի որ տարբեր պատճառաբանություններ էին բերում, առանց ասելու անգամ, թե որտեղ է իմ պաշտպանյալը, գնացել եմ քրեական վարչություն և հիվանդանոց, ի վերջո տեսա, որ գտնվում ա գծային վաշտում»,- նշեց պաշտպանն ու հավելեց՝ իր պաշտպանյալին բռնության են ենթարկել. տեսակցելիս նրա դեմքին և մարմնի տարբեր հատվածներին  հայտանաբերել է կապտուկներ, ունի ոտքի մատի կոտրվածք, սակայն ժամերով բժիշկ չեն կանչել: 

«Սահմանադրության օրը սահմանադրությունը ոտնահարվեց, ոչ մի բժշկական միջամտություն չեղավ, սակայն Ֆրանասիան այս հարցում ավելի բարեխիղճ կգտնվի: Իմ պաշտպանյալը ժամը 09:10-ին մեկնեց երկրից, ժամանելուց հետո անմիջապես կզբաղվեն նրա առողջական խնդրով, կտեղափոխեն հիվանդանոց»,-ասաց Մելքոնյանը:

Հիշեցնենք, որ Քալաշովը Ֆրանսիայի Հանրապետության իրավապահ մարմինների կողմից հետախուզվում էր 2015 թվականից։ Ըստ ոստիկանության պաշտոնական հաղորդագրության՝ նրան մեղադրանք էր առաջադրվել Ֆրանսիայի քրեական օրենսգրքով նախատեսված հանցավոր արարքներ կատարելու համար։ Մասնավորապես, նա մեղադրվում է փողերի լվացման, գողացված իրերը թաքցնելու, ինչպես նաև չարագործների խմբավորման հանցագործության նախապատրաստմանը մասնակցություն ունենալու մեջ։

Սոնա Հարությունյան