Դիլիջանում կատարված սպանությունը բացահայտվեց

Հուլիսի 9-ին, ժամը 21.10-ին, «Դիլիջան» բժշկական կենտրոնից ոստիկանություն հաղորդում է ստացվել, որ իրենց մոտ է տեղափոխվել 26-ամյա Գուրգեն Ղալեչյանի դին:

Հուլիսի 10-ին ոստիկանության Տավուշի մարզային վարչության, նույն մարզի դատախազության եւ քննչական ստորաբաժանման ծառայողների համատեղ օպերատիվ-հետախուզական ու քննչական ծավալուն միջոցառումների շնորհիվ պարզվեց, որ Հակոբջանյան փողոցում սպանությունը կատարել է նույն փողոցի բնակիչ, 27-ամյա մի տղամարդ:

Նա նաեւ մարմնական վնասվածքներ է պատճառել մեկ այլ քաղաքացու:

Ոստիկանության Դիլիջանի բաժնի ծառայողների բացատրական աշխատանքի արդյունքում, դեպքից ժամեր անց կասկածյալը ներկայացավ ոստիկանություն: Նա խոստովանեց կատարածը:

Հարուցվել է քրեական գործ՝ ՀՀ քրեական օրենսգրքի սպանության հոդվածի հատկանիշներով:

Կասկածյալը ձերբակալված է:

Կատարվում է քննություն: