Արա Կիրակոսյանն այսուհետ իր կալանքը կկրի բաց ռեժիմով, ազատության մեջ

Վարչապետի խորհրդական Եղիշե Կիրակոսյանը, ում անունը որոշ ժամանակ առաջ հոլովվում էր՝ որպես արդարադատության նախարարի ամենահավանական թեկնածու, սերում է Հայաստանում համենայն դեպս մասնագիտական շրջանակներում հայտնի ընտանիքից։ Նրա հայրը՝ Գրիգոր Կիրակոսյանը, անվանի տնտեսագետ է, 1993-2006թթ. զբաղեցրել է այն ժամանակ հայտնի Ժողինստիտուտի, ներկայիս Երևանի պետական տնտեսագիտական համալսարանի ռեկտորի պաշտոնը։

Եղիշե Կիրակոսյանի եղբայրը՝ Արա Կիրակոսյանը, բանկային աշխատանքի երկարամյա փորձ ունի։ Եղել է «Հայբիզնեսբանկ» ՓԲ վարչության նախկին նախագահ։ «Հայբիզնեսբանկ» ընկերությունից մեծ չափի գումար հափշտակելու, «Հայբիզնեսբանկ»-ի փողերի լվացման գործով մեղադրանքով այս պահին իր պատիժն է կրում քրեակատարողական հիմնարկում։

Արա Կիրակոսյանը Կենտրոն և Նորք-Մարաշ վարչական շրջանների ընդհանուր իրավասության դատարանում մեղավոր էր ճանաչվել առաջադրված բոլոր մեղադրանքներում և դատապարտվել 13 տարվա ազատազրկման: Վերջինս այս գործով մեղադրվում էր Քրեական օրենսգրքի 4 հոդվածներով՝ 214-րդ հոդվածի երկրորդ մասով, այն է՝ առևտրային կամ այլ կազմակերպությունների ծառայողների կողմից լիազորությունները չարաշահելը, որն առաջացրել է ծանր հետևանքներ: Այս մեղադրանքի համար նրան 2 տարվա ազատազրկում է նշանակվել:

325-րդ հոդվածի երկրորդ մասով, այն է՝ փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշեր կեղծելը, իրացնելը կամ օգտագործելը, որոնք կատարվել են մի խումբ անձանց կողմից` նախնական համաձայնությամբ: Նախատեսվել է 1 տարի ազատազրկում:

178-րդ հոդվածի 3-րդ կետի առաջին մասով, այն է՝ խարդախություն, որը կատարվել է առանձնապես խոշոր չափերով: Դատապարտվել է ազատազրկման 6 տարի ժամկետով` գույքի կեսի բռնագրավմամբ, սակայն ոչ ավելի 500 հազար եվրոյին համարժեք ՀՀ դրամ գումարից,

190-րդ հոդվածի երրորդ կետի առաջին մասով՝ հանցավոր ճանապարհով ստացված գույքն օրինականացնելը (փողերի լվացումը), որը կատարվել է առանձնապես խոշոր չափերով: Դատապարտվել է ազատազրկման 8 տարի ժամկետով` գույքի կեսի բռնագրավմամբ, սակայն ոչ ավելի 500 հազար եվրոյին համարժեք ՀՀ դրամ գումարից։

Պատիժները լրիվ և մասնակիորեն գումարելու սկզբունքների կիրառմամբ նրան վերջնական պատիժ էր սահմանվել 13 տարի ազատազրկումը:

Սակայն 2018թ. հոկտեմբերին Վերաքննիչ քրեական դատարանը Արա Կիրակոսյանի պատժաչափը փոփոխել է՝ 13 տարվա ազատազրկումը դարձնելով 10 տարի, սակայն կարծես թե նոր իրողությունների պայմաններում «Հայբիզնեսբանկի» վարչության նախկին նախագահը դժվար թե ամբողջությամբ կրի իր պատժաչափը։

Արա Կիրակոսյանի ազատության ճանապարհը

168.am-ին հասած տեղեկություններով՝ Արա Կիրակոսյանին որոշ ժամանակ առաջ առաջարկվել էր Քրեկատարողական ծառայությանը դիմել պատժի ռեժիմի փոփոխության խնդրանքով, ինչը նրան թույլ կտա հետագայում պատժի հետագա կրումից պայմանական-վաղաժամկետ ազատվել։

Այդ ժամանակ մենք հարցեր էինք ուղղել ՔԿԾ-ին՝ փորձելով հասկանալ, թե որքանով են այդ լուրերը համապատասխանում իրականությանը՝

1. «Հայբիզնեսբանկի» վարչության նախկին նախագահ Արա Կիրակոսյանը իր պատժաչափի ո՞ր մասն է կրել արդեն և դեռ որքա՞ն պետք է կրի իր պատիժը։
2. Ո՞ր քրեակատարողական հիմնարկում է իր պատիժր կրում Արա Կիրակոսյանը։
3. Ի՞նչ ռեժիմով է իր կալանքը կրում Արա Կիրակոսյանը։
4. Արդյո՞ք վերջինս դիմել է Քրեակատարողական ծառայությանը կալանքի ռեժիմի փոփոխության խնդրանքով։ Եթե դիմել է, ապա ի՞նչ որոշում է կայացվել և ե՞րբ։

Քրեակատարողական ծառայության պատասխանը ներկայացնում ենք ստորև՝

Ի պատասխան Ձեր՝ 17.06.2019թ. հարցման՝ հայտնում եմ, որ «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 2-րդ կետի համաձայն՝ տեղեկատվության տնօրինողը մերժում է տեղեկատվության տրամադրումը, եթե դա խախտում է մարդու անձնական և ընտանեկան կյանքի գաղտնիությունը, այդ թվում՝ նամակագրության, հեռախոսային խոսակցությունների, փոստային, հեռագրական և այլ հաղորդումների գաղտնիությունը, իսկ «Անձնական տվյալների պաշտպանության մասին» ՀՀ օրենքի 4-րդ հոդվածի 2-րդ մասի համաձայն՝ անձնական տվյալները մշակվում են օրինական և որոշակի նպատակներով և առանց տվյալների սուբյեկտի համաձայնության՝ չեն կարող օգտագործել այլ նպատակներով։

Տվյալ դեպքում բացակայում է Արա Գրիգորի Կիրակոսյանի համաձայնությունը, ուստի հնարավոր չէ տեղեկատվություն տրամադրել։

Մի կողմ թողնենք այն հանգամանքը, որ մեր հարցերից գրեթե բոլորի պատասխանը այնքան բաց տեղեկատվություն է, որ այն կարելի է գտնել՝ որոնողական համակարգում ընդամենը մեկ փորձ կատարելով, և տարօրինակ է, որ ՔԿԾ-ում այն հրապարակման ոչ ենթակա տեղեկատվություն էին համարում, սակայն այնուամենայնիվ, այդ պատասխանից հասկանալի չեղավ, թե Արա Կիրակոսյանը հրաժարվե՞լ է, որ իրեն վերաբերող տեղեկություններ հրապարակվեն, որովհետև նույն կերպ պետք է դեմ լիներ իր դատական նիստերի լուսաբանմանը, թե՞ նրան առհասարակ չեն էլ հարցրել։ Ինչևէ…

Այսպես, համացանցը մեզ տեղեկացրեց, որ ՀՀ ԱՆ «Նուբարաշեն» քրեակատարողական հիմնարկում իր պատիժը կրող Արա Կիրակոսյանի պատժի սկիզբը հաշվարկվել է 2013թ. դեկտեմբերի 6-ից։ Այսինքն՝ Ա. Կիրակոսյանն արդեն կրել է պատժի կեսը, հետևաբար՝ հիմա պատժաչափի մնացած մասը չեղարկելն ավելի հեշտ կլինի։ Կալանքի ռեժիմի փոփոխություն, պայմանական-վաղաժամկետ ազատ արձակվելու ընթացակարգեր, քրեակատարողական հիմնարկից գերազանց բնութագիր, և բաղձալի ազատությունը քեզ է սպասում։

Մեր տեղեկություններով՝ Արա Կիրակոսյանի դիմումը բավարարվել էր, և նա տեղափոխվել էր ՀՀ ԱՆ «Սևան» քրեակատարողական հիմնարկ՝ կիսաբաց ռեժիմով կալանքը կրելու։

Ինչպես և նախատեսվում էր, դրան պետք է հետևեր հաջորդ քայլը՝ կալանքի բաց ռեժիմը։

Եվ ահա, 168.am-ը տեղեկացավ, որ «Հայբիզնեսբանկի» խորհրդի նախկին նախագահ Արա Կիրակոսյանն այսուհետ իր կալանքը պետք է կրի բաց ռեժիմով, ինչը նշանակում է, որ նա կարող է առավոտյան դուրս գալ քրեակատարողական հիմնարկից, իսկ երեկոյան վերադառնալ ու գիշերել այնտեղ։

Փաստորեն, կարելի է ասել, Արա Կիրակոսյանն այժմ մասնակիորեն ազատության մեջ է, որին, իհարկե, կհաջորդի իրական, կատարյալ ազատությունը՝ պայմանական-վաղաժամկետ ազատության տեսքով։

Հիշեցնենք` Արա Կիրակոսյանին մեղադրանք էր առաջադրվել այն բանի համար, որ նա 2006թ. օգոստոսի 21-ից մինչև 2013 թվականի հոկտեմբերի 01-ը, լինելով «Հայբիզնեսբանկ» ՓԲԸ-ի վարչության նախագահը, իր կարգադրիչ և այլ լիազորություններն այդ կազմակերպության շահերին հակառակ՝ իր և ուրիշ անձանց օգտին օգտագործելով, նույն բանկի վարչության նախագահի տեղակալ–Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք Եսայանի, Իրանի և ԱՄՆ քաղաքացի Մաջիդ Ռ․ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Ջեներալ Թրեյդինգ» ՍՊ ընկերության հիմնադիր-տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Գաբրիելյանի և ՀՀ-ում գրանցված «Դավ Տրանս Ստրոյ» ՍՊԸ հիմնադիր֊ տնօրեն, ՀՀ քաղաքացի Դավիթ Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000 եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերություններն իրավունք են ձեռք բերել նույն չափով գումարներ ստանալու հայցապահանջ ներկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն է ստանձնել։

Լուսանկարը՝ hetq.am-ի