Ֆրանսիացի «Սարդ-մարդը» հաշտության կոչով դրոշ Է ամրացրել Հոնկոնգի երկնաքերի վրա. AFP

Համաշխարհային Մամուլ 16 Օգոստոս, 2019 12:45

Ֆրանսիացի ժայռամագլցող Ալեն Ռոբերը, որը ժողովրդի մեջ ստացել Է «Սարդ-մարդ» մականունը, Հոնկոնգի երկնաքերներից մեկի վրա ամրացրել Է դրոշ՝ յուրատեսակ կոչ Չինաստանին և Հատուկ վարչական շրջանին հաշտվելու բողոքի ակցիաների ֆոնին, որոնք սկսվել են Պեկինի պայմաններով արտահանձնման մասին օրենքն ընդունելու Հոնկոնգի իշխանությունների մտադրությունից դժգոհության պատճառով:

Օգոստոսի 16-ին այդ մասին հաղորդել Է Agence France-Presse (AFP) գործակալությունը:

Գործակալության զետեղած կադրերում երևում Է, թե ինչպես Է ալպինիստի վառ հանդերձանքով տղամարդը ամրացնում պաստառը, որի վերին մասում պատկերված են Չինաստանի և Հոնկոնգի դրոշները, իսկ դրանց տակ՝ խորհրդանշական ձեռքսեղմում, ինչն իրենից ներկայացնում Է հաշտության կոչ Հատուկ վարչական շրջանում Չինաստանի քաղաքականության դեմ մի քանի ամիս չհանդարտվող բողոքներից հետո:

Երկնաքերը, որի ճակատամասին Ռոբերն ամրացրել Է իր դրոշը, պատկանում Է հայտնի բարեգործ և Ասիայի ամենաազդեցիկ գործարարներից մեկին՝ հոնկոնգցի մագնատ Լի Կա Շինին, նշել Է Bloomberg գործակալությունը:

Գործակալության տեղեկատվությամբ՝ բիզնեսմենն ինքը, որը գործարար շրջաններում հայտնի Է Սուպերմեն մականունով, տեղի թերթերում հրապարակել Է մի շարք հայտարարություններ, որոնցում բողոքների դադարեցման կոչ Է արել քաղաքացիներին: «Սիրեցե՛ք Հոնկոնգը, սիրեցե՛ք Չինաստանը, սիրեցե՛ք ձեզ»,- ասված Է դրանցից մեկում, հաղորդել Է ՏԱՍՍ-ը: