Դատարանը մերժել է Քսենիա Սոբչակին

Բասմանյան դատարանը այսօր մերժեց ռուս հայտնի հեռուսահաղորդավարուհի և ընդդիմադիր ակտիվիստ Քսենիա Սոբչակի հայցն ընդդեմ ոստիկանության, որով Սովչակը պահանջում էր, որ իրեն վերադարձվի քննիչների մոտ պահվող իր 1,5 միլիոն եվրոն: Այս մասին հաղորդում է BBC-ն:

Հիշեցնենք, որ ս.թ. հունիսի 11-ին Ռուսաստանի ոստիկանությունը խուզարկել էի Սոբչակի բնակարանը և առգրավել էր տանը պահվող կանխիկ գումարը` 1,5 միլիոն եվրո: ՌԴ ոստիկանության քննչական վարչության ներկայացուցիչը հայտարարել է, որ իրենք չեն կարող վերադարձնել գումարը, քանի որ համոզված չեն, որ այդ գումարով չեն կազմակերպվի զանգվածային անկարգություններ:

Քսենիա Սոբչակը հայտարարել է, որ բողոքարկելու է այս վճիռը Մոսկվայի քաղաքային դատարանում և Twitter-ի իր էջում հավելել է. «Դատարանը պետք է լսի կողմերին և կայացնի արդար վճիռ և ոչ թե հայտարարի, որ ինքը քննիչ է, ուրեմն ամեն ինչ ճիշտ է անում»:

Նշենք, որ Սոբչակը պնդում էր, որ դա իր անձնական ֆինանսական միջոցներն են և գտնվում են տանը, քանի որ ինքը չի վստահում ռուսաստանյան բանկերին: Իսկ ահա «Ֆորբս» ամսագրի տվյալներով Քսենիա Սոբչակի տարեկան եկամուտը կազմում է ավելի քան 2,8 միլիոն դոլար: