Ե՞րբ ենք սահմանադրական այս շիլաշփոթին վերջ տալու․ Արման Բաբաջանյան (տեսանյութ)

ԱԺ-ում այսօր քննարկվեց կառավարության կողմից ներկայացված ՀՀ-ի և Դանիայի Թագավորության միջև եկամուտների և գույքի կրկնակի հարկումը բացառելու և հարկումից խուսափելու կոնվենցիան վավերացնելու մասին օրենքի նախագիծը։

ԱԺ տնտեսական հարցերի մշտական հանձնաժողովի անդամ Հովիկ Աղազարյանը նշեց, որ այս հարցն անցել է պետական բոլոր ատյաններով, որևէ խնդիր չի առաջացել, ուստի կոչ է անում բոլորին կողմ քվեարկել այս նախագծին։

ԱԺ պատգամավոր Արման Բաբաջանյանը, նախագծի վերաբերյալ դիմելով Աղազարյանին նշեց, որ սույն կոնվենցիայի վերաբերյալ որոշում է կայացրել Սահմանադրական դատարանը։

«Մենք վերջին օրերին ՍԴ-ի շուրջ բավականին լարված շրջան ենք անցնում, և հայտնի քրեական գործի վերաբերյալ ՍԴ որոշումը իմ որոշ գործընկերներ որոշել են չճանաչել։ Հիմա այստեղ վկայաբերվեց, որ այս կոնվենցիան ճանաչվել է սահմանադրական այն նույն դատավորների կողմից, ովքեր որոշում են կայացրել հայտնի քրեական գործի շրջանակներում։ Հիմա մի դեպքում ճանաչում ենք ՍԴ-ի կայացրած որոշումը, մյուս դեպքում՝ ոչ, ե՞րբ ենք այս շիլաշփոթին վերջ տալու»,- ասաց Բաբաջանյանը։