Մենք բոլոր հիմքերն ունենք այս փաստաթուղթն անվավեր ճանաչելու համար․ բանախոսները՝ Ամուլսարի մասին

Ամուլսարի, որպես հանք շահագործումն արգելող իրավական հիմնավորումների մասին են խոսել աշխարհագրագետ, Հայկական բնապահպանական ճակատի անդամ Լևոն Գալստյանը և Էկոլոգիական իրավունքի մասնագետ Նազելի Վարդանյանը: Բանախոսների պնդմամբ` տարիներ շարունակ Ամուլսարը հանք դարձնելու գործընթացով խախտվել են բազմաթիվ ՀՀ օրենքներ, չի պաշտպանվել նաև ՀՀ քաղաքացիների շահն ու իրավունքը: Խնդրի մասին խոսվել է ոչ թե այսօր կամ երեկ, այլ 2010-2011 թվականից, երբ առաջին անգամ հանրությանը պարզ դարձավ, թե ինչ ծրագիր է նախատեսվում իրականացնել Ջերմուկ քաղաքի հարևանությամբ:

Վերջին 7-8 տարիների ընթացքում եղել են բոլոր հնարավոր պայմանները այդ ծրագիրը դադարեցնելու համար, որոնցից առաջինը Լևոն Գալստյանը համարում է հետևյալը. «Ջերմուկ քաղաքը 2009 թվականից մինչև 2016 թվականը չի համարվել ազդակիր համայնք և քաղաքի բնակիչները չեն կարողացել մասնակցել որոշումների կայացմանը: Այս ընթացքում 4 ՇՄԱԳ է ներկայացվել, հաստատվել ու ստացել է դրական եզրակացություն, բայց տեղի բնակիչները չեն կարողացել մասնակցել դրանց: 2016 թվականին տարբեր ճնշումների տակ, ի վերջո, համարվեց ազդակիր համայնք, բայց այդպես էլ Ջերմուկ քաղաքում օրենքով սահմանված կարգով ոչ մի հանրային լսում, քննարկում չանցկացվեց:

Կետ եմ մեջբերում օրենքից. օրենքում գրված է՝ ՇՄԱԳ հաշվետվություն կազմելու համար, փորձաքննության համար անպայման պետք է ներառված լինի ազդակիր համայնքի նախնական համաձայնության փաստաթուղթ: Առ այսօր մենք չենք տեսել Ջերմուկ քաղաքի նախնական համաձայնության փաստաթուղթը: Մեզ տրվել է միայն Գնդեվազ, Սալավան և Գորայք գյուղերի համաձայնության փաստաթուղթ: Իսկ, եթե գոյություն չունի Ջերմուկ քաղաքի 2016 թվականին տրված համաձայնությունը, ապա պարզ է, որ փորձաքննության ամբողջ գործընթացը հենց սկզբից իրականացվել է օրենքի խախտումով»:

Նազելի Վարդանյանը ոչ միայն արձանագրում է խախտումներ ՀՀ բազմաթիվ օրենքներում, օրինակ Սևանա լճի մասին օրենքում, Ընդերքի մասին օրենքում, այլ նաև պնդում է, որ Էլարդի ներկայացրած փաստաթուղթն անվավեր է: 

«Մենք բոլոր հիմքերն ունենք այս փաստաթուղթն անվավեր ճանաչելու համար, քանի որ շրջակա միջավայրի վրա ազդեցության գնահատման և փորձաքննության մասին օրենքում նշված է, որ ձեռնարկողը պարտավոր է հավաստի տվյալներ ներկայացնել։ Իսկ 2016 թվականին և մինչ այդ իրականացված բոլոր փորձաքննությունները հստակ խախտել են մեր օրենքները, շրջանցել են օրենքներում եղած բազմաթիվ արգելքներ: ՀՀ օրենքների հետ մեկտեղ խախտվել են նաև միջազգային 2 կոնվենցիաներ»,-ասաց Վարդանյանը:

«Նույնիսկ ԷԼԱՐԴԻ փաստաթղթի պարունակությունը, որի հայերեն թարգմանությունը մոտավորապես 250 էջ է, վկայում է բազմաթիվ թերացումների, սխալների ու կասկածների մասին»,- ասում է Լևոն Գալստյանը` հավելելով․- «Կարդում եմ բառեր, որոնք անընդհատ կրկնվում այդ փաստաթղթի մեջ։ Կասկածելի՝ 18 անգամ, թերի՝ 59 անգամ, սխալ՝ 60 անգամ, մտահոգ՝ 30 անգամ, անվստահելի՝ 7 անգամ, անորոշ 34 անգամ, թերություն՝ 18 անգամ, վատ՝ 11 ամգամ, անբավարար՝ 14 անգամ և չի կատարվել՝ 4 անգամ։ Այսպիսի պարունակությամբ փաստաթղթից հետո եզրակացնել, որ այս հանքավայրը այս վիճակում կարելի է շահագործել, բոլոր տեսակի տրամաբանությունից դուրս է»:

Գալստյանի հավաստմամբ՝ գործընթացը կոռուպցիայի մեծ կծիկ է, որից օգտվել են նախկին իշխանություններն ու նախկինում գործած կուսակցությունները։ «Բոլոր նախկին կուսակցությունները, որոնք այսօր մեծ-մեծ խոսում են, թե Ամուլսարը հանք չպիտի դառնա, պատասխանատու են այսօրվա վիճակի համար: Իրենց օրոք, իրենք թույլտվությամբ է սկսվել անօրինությունների, կոռուպցիայի այս մեծ գործընթացը, և իրենք են առաջին ու անմիջական պատասխանատուները»,-ասաց Գալստյանը, հավելելով, որ  ներկա կառավարությանը խնդրում է չկրկնել նախկինների քայլերը, հակառակ դեպքում կտուժի ողջ հայ ժողովուրդը: